Anasayfa

004 - Tahmîs-i Gazel-i Sultân Süleymân Hân

Ayrıntılar

Üst Kategori: Bâkî

Kategori: Musammatlar

Görüntüleme: 513

• Vezin: Fâ'ilâtün Fâ'îlatün Fâ'ilâtün Fâ'ilün

-I-
1    Câme-i sıhhat Hudâdan halka bir hıl'at gibi
2    Bir libâs-ı fâhir olmaz cisme ol kisvet gibi
3    Var iken baht u sa'âdet kuvvet ü kudret gibi
4    Halk içinde mu'teber bir nesne yok devlet gibi
5    Olmaya devlet cihânda bir nefes sıhhat gibi
-II-
1    Ehl-i vahdet kâ'inâtun 'âkil ü dânâsıdur
2    Merd-i fârig 'âlemün mümtâz ü müstesnâsıdur
3    Gör ne dir ol kim sözi gûyâ Mesîh enfâsıdur
4    Saltanat didükleri ancak cihân gavgâsıdur
5    Olmaya baht u sa'âdet dünyede vahdet gibi
-III-
1    Tâ'at-i Hak mûnis-i bezm-i bekâdur 'âkıbet
2    Sıhhat-i cân u beden senden cüdâdur 'âkıbet
3    Bâd-ı sarsardur fenâ 'âlem hebâdur 'âkıbet
4    Ko bu 'ayş u 'işreti çünkim fenâdur 'âkıbet 
5    Yâr-i bâkî ister isen olmaya tâ'at gibi
-IV-
1    Âlemi gözden geçürsen eylesen bin yıl rasad
2    Devr içinde turmasan görsen hezârân nîk ü bed
3    Her tarafdan aksa dünyâ mâlı gelse lâ-yu'ad
4    Olsa kumlar sagışınca 'ömrüne hadd ü 'aded
5    Gelmeye bu şîşe-i çarh içre bir sâ'at gibi
- V -
1    Menzil-i âsâyiş-i 'ukbâya istersen vüsûl
2    Hubb-i dünyâdan ferâgat gibi olmaz togrı yol
3    Şâd-mân erbâb-ı 'uzletdür hemân Bâkî melûl
4    Ger huzûr itmek dilersen ey Muhibbî fârig ol
5    Olmaya vahdet makâmı gûşe-i 'uzlet gibi