022 - Kasîde-i Bâkî berây-ı Hvâce-i Sultân Selîm

1    Gül-şene altun varaklar zeyn idüp bâd-ı hazân / Gûyiyâ zer-kûblar dükkânı oldı gül-sitân
2    Rişte-i bârân gümiş tel sim-keş ebr-i harîf / İki çarha döndiler gûyâ zemîn ü âsmân
3    Berg-i bîdi bâgda âb-ı revân üzre görüp / Didiler akmış gılâfından bu tîg-i zer-nişân
4    Reh-güzâr-ı bâga ser-tâ-pâ dökilmiş berg-i zer / Sandum altun tebsiler konmış simât-ı husrevân
5    Bâgda gerdân ider evrâkı sanman gird-bâd / İndiler seyyâreler kılmaga seyr-i bûstân
6    Perr ü bâl açmış yeşil tûtî iken berg-i çenâr / Zerd olup ser-pençe-i şeh-bâza dönmişdür hemân
7    Râygân aldum sanurdı la'l u yâkûtı velî / Şimdi nakd altun sayar turmış nihâl-i ergavân
8    Kanlu yaş dökmiş ruh-ı zerd ü gubâr-âlûdına / Var ise dehrün fenâsın andı mîr-i 'âşıkân
9    Saltanat tâcın geyen 'âlemde magrûr olmasun / Nice sultân börkin almışdur begüm bâd-ı hazân
10    Gerçi merdâne soyındı girdi meydâne dıraht / Geldi kış basdı velîkin virmedi asla emân
11    Dest-bürd-i sarsarı âhır görüp şâh-ı çenâr / Didi el arkası yirde âferînler pehlevân
12    Jâle vü berg-i hazândan pür-zer ü gevher çemen / Gül-şene vann nisâr itdi meger deryâ vü kân
13    Gevher-i sîr-âb şeb-nem gûş-vâr-ı zer varak / Sahn-ı büstân oldı gûyâ çâr-sûy-ı zer-gerân
14    Şöyle benzer kim hat-ı âyât-ı rahmetdür çemen / Bâd-ı subh itmişdür altun hail ile yir yir nişân
15    Bir yeşil garrâ zer-efşân kâgıd olmışdur çemen / Yaraşur yazılsa ger medh-i edîb-i nükte-dân
16    Hvâce-i 'âlî-nazar ser-çeşme-i fazl u hüner / Dâver-i ferhunde-ahter kâm-bahş u kâm-rân
17    Âfitâb-ı 'âlem-ârâ-yı sipihr-i fazl o kim / Buldı re'y-i enveri feyziyle nûr u fer cihân
18    Ayagı topragıdur kühl-i cevâhir encüme / Âsitânı hâkidür iklîl-i fark-ı Farkadân
19    Rûzgârun şiddetinden gül-şen-i bahtı masûn / Nitekim bâd-ı hazândan sahn-ı gül-zâr-ı cinân
20    Safha-i âyîne-i 'âlem-nümâ-yı tab'ına / Cümle-i dünyâ vü mâ-fihâ muşavverdür 'ayân
21    Râh-ı bâga berg-i zer düşmiş degüldür ser-verâ / Reh-güzârunda yüzin ferş itdi mâh-ı âsmân
22    Eyleyüpdür feyz-i hûrşîd-i kemâl-i sun' ile / Zât-i pâkün gevherin perverde kân-ı Kün fe-kân
23    Meclisünde kalbi altun gibi sâfî olmayan / Kâl ocagından halâs olmaz kılursan imtihân
24    Âfet-i bâd-ı hazândan tâ ebed mahfûz olur / Bâg-ı dehre hüsn-i tedbîrün olursa bâg-bân
25    Sarsar-ı gam fikrüm evrâkın perîşân eyledi / Çihre-i zerdüm belâdan buldı reng-i za'ferân
26    Cür'a-i câm-ı belâ-encâm-ı gam bî-hûş idüp / 'Âkıbet kıldı humâr-ı derd ü mihnet ser-girân
27    Cür'a-veş ayakda kodı sâkî-i devrân beni / Dest-gir ol ey emîr-i meclis-i devr-i zamân
28    Himmetün şimşâdınun şâh-ı bülendi var iken / Kanda yapsun şâh-bâz-ı tab'-ı Bâkî âşiyân
29    Destüme alsam kalem nazm-ı bedi'ümle benem / Nîze-bâz-ı 'arsa-i mülk-i ma'ânî vü beyân
30    Ben kemend-endâz-ı meydân-ı belâgat olalı / Halka-i teslîme geçmişdür ser-i gerden-keşân
31    Pehlevân-ı 'arsa-i nazmem diyen ferzâneler / Bir iki zâr u zebûnumdur za'îf ü nâ-tevân
32    Muttasıl şi'rüm yazarken hâme turmaz deprenür / Neydür anı gûyiyâ lerzân ider âb-ı revân
33    Bâg u bustân içre tâ ola bisât-ı sebzeye / Subh-dem berg-ı hazândan katre-i şeb-nem çekân
34    Her seher sahn-ı zümürrüd-gûn-ı gerdûn üstine / Âfıtâb altun tabakdan tâ ola gevher-feşân
35    Mesned-i rif'atde genc-efşân-ı ihsan ol müdâm / 'Ömr ü devlet pây-dâr ikbâl ü 'izzet câvidân