021 - Şitâ'iyye be-nâm-ı Müfti'z-zamân Ebû's-su'ûd

1    Agardı berf île yir yir çemende cism-i nihâl / Niteki penbe-i dâg ile sîne-i abdâl
2    Zemîne bâd-ı hevâdan çok akçe düşdi yine / Pür itdi dâmen-i sahrâyı toldı ceyb-i cibâl
3    Meger ki hokka-i çarhûn zamane harrâtı / Döker tırâşesini kûh u deste berf-misâl
4    Zemîne dâmen-i ebr ile saçdı sîmi felek / Bu hâleti göricek mâ'il oldı taze nihâl
5    Bu fasl içinde şu kim sabrı kaldı ser-mâye / Olur nihâl-i çemen gibi gark-ı mâl u menâl
6    Cihânı berf ile yah tutdı kış kıyâmetdür / 'Aceb mi yir yüzine çıksa hep defâ'in-i mâl
7    Pür oldı şahları üzre yahdan âyineler / Garîb sûrete girdi bu fasl içinde gazâl
8    Meger ki 'âlem-i 'ulvîde nev-bahâr oldı / Döker şükûfe-i bâdâmı sahn-ı bâga şimâl
9    Sevâhil-i çemene çıkdı genc-i bâd-âverd / Yöneldi Husrev-i nev-rûza devlet ü ikbal
10    Döşendi berf ser-â-pây sahn-ı sahrâya / Agardı rûy-ı zemin sanki tahta-i remmâl
11    Nişân-ı pây-ı vuhûş u tuyûr sahrâda / Çizildi rîk-i selîd üzre gûyiyâ eşkâl
12    Beyâz düşdi hele şekl-i tâli'-i eyyâm / Misâl-i çihre-i baht-ı edîb-i ferruh-fâl
13    Ser-i efâzıl-ı âfâk müftî-i 'âlem / Sipihr-i fazl u kemâl âfitâb-ı câh u celâl
14    İmâm-ı saff-ı efâzıl emir-i hayl-i kirâm / Emîn-i dîn ü düvel hvâce-i huceste-hısâl
15    Ebû Hanîfe-i sânî Ebu's-su'ûd ol kim / Fezâ'il içre efâzıl olupdur ana 'ıyâl
16    O kim yazılmış ezel tâk-ı bâr-gâhında / Melâz u melce'-i erbâb-ı fazl u ehl-i kemâl
17    Şu denlü şân-ı şerîfinde var anun 'azamet / Ki kendüsin yitürür meclisine gelse celâl
18    Durûb-ı tîg-i havâdisden özge bulmadılar / Şolar ki kendülerin ana tutdılar emsâl
19    Nücûm içinde Süreyyâ terâzû ile yürür / Ki sâdır olmaya eyyâm-ı devletinde vebâl
20    Kemîne bende-i dîrînenem hudâvendâ / Bu bende cânibini lutfun itmesün ihmâl
21    Ma'ârif ehline kapundan irişür ma'rûf / Fezâ'il ehline tapundan irişür efzâl
22    Kerîm özünle mükerrem cihânda lutf u kerem / Şerîf adunla müşerref kabâle-i ikbâl
23    'Arûs-ı dehre senânı benem kılâde kılan / Güher edâ-yı girân-mâye rişte ince hayâl
24    Selâset-i kelimâtum safâ-yı eş'ârum / Akar su gibi kılupdur kulûbı hep meyyâl
25    Terâne eylese bülbül çemende güftârum / Gelüp öninde zemîn-bûs iderdi âb-ı zülâl
26    Velîkin âyine-i tab'-ı safvet-âyînün / Bu rûzgârda var sûretinde gerd-i melâl
27    Fezâ-yı fakr u felâketde savlecân-ı kazâ / Getürdi gûy-sıfat döne döne başuma hâl
28    Hemîşe nergis-i ikbâl u baht hvâb-âlûd / Hemîşe turra-i tâli' müşevveşü'l-ahvâl
29    Nigîn-i baht u sivâr-ı sa'âdet elde degül / Ayakda kodı zamâne niteki zer halhâl
30    Hezâr bâr belâ pûtesinde kâl oldum / Henüz âteş-i mihnetde yok halâsa mecâl
31    Du'â-yı devletine kıl 'azîmet ey Bâkî / Murâd neydügi ma'lûm zâhir oldı me'âl
32    Hemîşe tâ kıla keff-i direm-feşân-ı sabâ / Şitâda dâmen-i küh-sâr u deşti mâl-â-mâl
33    Eyâdi-i keremün berr ü bahre şâmil ola / Niteki eyleye her cânibe şümûl-i şimâl
34    Cihân musahhar-ı fermân ola murâdâtun / Müyesser eyleye dâ'im Müyessirü'l-a'mâl