001 - Kasîde berây-ı Sultân Süleymân Hân 'aleyhi'r-rahmetü ve'l-gufrân

1    Hengâm-ı şeb ki küngüre-i kasr-ı âsmân / Zeyn olmış idi şu'lelenüp şem'-i ahterân
2    Hayl-i kevâkib içre yanup meş'al-i kamer / Sahn-ı semâda rûşen idi râh-ı keh-keşân
3    Dest urmış idi kilk-i şihâba debîr-i çarh / Tugrâ-nüvîs-i hükm-i Hudâvend-i ins ü cân
4    Bezm-i felekde urmış idi Zühre sâza çeng / 'Ayş u safâda hurrem ü handân u şâd-mân
5    Bu çarh-ı çenberîde tutup devr usûlini / Deffâf-ı mihr kılmış idi çihresin nihân
6    Bir tîg-i zer-nişân ile girmişdi 'arsaya / Şemşîr-bâz-ı ma'reke-i sahn-ı âsmân
7    Tedbîr-i mu'zamât-ı umûr-ı cihân içün / Yakmışdı şem'-i fikreti Bircîs-i nükte-dân
8    Bâlâ-yı çarh-ı heftüme Keyvân-ı kühne-sâl / Oturmış idi niteki Hindû-yı pîl-bân
9    Âyâ bu zîb ü zînet-i 'âlem nedür diyü / 'İbret göziyle nâzır iken dehre nâgehân
10    Etrâfa saldı şa'şa'asın gûşe gûşe mihr / Oldı ufukda mühr-i Süleymân gibi 'ayân
11    Kıldı bu hâli dîde-i'ibret müşâhade / Tuydı bu sırrı 'âkıbetü'l-emr gûş-ı cân
12    Kim bu nizâmı virmedi 'âlem sarâyına / İllâ ki yümn-i devlet-i Şâh-ı cihân-sitân
13    Bâlâ-nişîn-i mesned-i şâhân-ı tâc-dâr / Vâlâ-nişân-ı ma'reke-i 'arsa-i Keyân
14    Cemşîd-i 'ayş ü 'işret ü Dârâ-yı dâr u gîr / Kisrî-i 'adl ü re'fet ü İskender-i zamân
15    Sultân-ı şark u garb şehenşâh-ı bahr u ber / Dârâ-yı dehr Şâh Süleymân-ı kâm-rân
16    Ol şeh-süvâr-ı memleket-i 'adl ü dâd kim / Atı önince olsa revâ husrevân revân
17    Ser-keşlik itdi emrine benzer peleng-i çarh / Zencîr ile getürdi yine keh-keşân keşân
18    Sâhib-vücûd-ı memleket-i lutf u cûd o kim / Mebzûl hvân-ı lutfına mahsûl-i bahr u kân
19    Müştâk bûy-ı hulkına 'attâr-ı nev-bahâr / Muhtâc dest-i himmetine hvâce-i hazân
20    Devründe kimse cevr-i sitem-gerden inlemez / Bî-şer' ider iderse eger çeng ü ney figân
21    'Adlün katında cevr ü sitem dâd-ı Keykubâd / Hışmun yanında lutf u kerem kahr-ı Kahramân
22    Lerzende görse havfun ile teb tutar sanur / Bağlar şihâb gerden-i gerdûna rîsmân
23    Tîgun 'adem diyârına rûşen tarîkdur / A'dâ-yı dîni turma kılıçdan geçür hemân
24    Deryâ-misâl 'askerün içre 'alemlerün / Feth ü zafer sefînesine açdı bâd-bân
25    Minkârına dilerse alur çarhı dâne-vâr / 'Ankâ-yı Kâf-ı kadrine bir tu'medür cihân
26    Çevgân urupdur ana ezel dest-i himmetün / Ol dem bu dem-durur ki döner gûy-ı âsmân
27    Bâg-ı senâ vü gül-şen-i medhünde mürg-i dil / Bu nazm-ı rûh-bahşı okur su gibi revân
28    Cân olmayaydı ol dehen ey şûh-ı dil-sitân / Niçün olurdı cân gibi ya dîdeden nihân
29    Ruhsârun üzre turralar olmış girih girih / Gûyâ Hicâza bagladılar Şâmiyân miyân
30    Görsün nihâl-i serv-i sanavber-hırâmunı / Ayruk çemende beslemesün bâg-bân bân
31    La'lün hayâli hokka-i hâtırda var iken / Yâkût-ı nâba olmamış idi mekân kân
32    Bârîk-bîn olanlar ider kaşlarun hayâl / Dendâdunı tasavvur ider tab'-ı hurde-dân
33    Mesken şeh-i mahabbetüne taht-gâh-ı dil / Menzil hayâl-i la'lüne halvet-sarây-ı cân
34    Kıldı sücûd haddüne karşu gül ü semen / İtdi kıyâm kâmetüne serv-i bûstân
35    Tutdı cihânı pertev-i hüsnün güneş gibi / Toldı sadâ-yı 'aşkun ile kâh-ı Kün fe-kân
36    Eflâke çıkdı velvele-i 'arsa-i zemîn / İndi zemîne gulgule-i âsmâniyân
37    Bâkî-sıfat ne bülbül-i rengîn-edâ gele / Ne ola tal'atun gibi ferhunde gül-sitân 
38    Hüsnün güliyle bâg-ı cihân gül-şen-i İrem / Her sû hezâr bülbül ü sad gûne dâstân
39    Der-gâh-ı Hakka yüz tutalum ber-mezîd ola / Câh u celâl-i saltanat u baht-ı câvidân
40    Tâ şem'-i âfitâb-ı cihân-tâba subh-dem / Devrân ufukda vaz' ide bir sîm şem'-dân
41    Şem'-i bekânı bâd-ı fenâdan nigâh ide / Dâmân-ı 'avn u 'ismet-i dârende-i cihân
42    Bezmünde baht sâkî vü ikbâl hem-nişîn / Câm-ı sipihr sâgar-ı pûlâd-ı zer-nişân