002 - Der-tehniye-i kudûm-i Sultân Süleymân Hân ez sefer-i huceste-eser

1    İtdi şehri şeref-i makdem-i Sultân-ı cihân / Reşk-i bâg-ı İrem ü gayret-i gül-zâr-ı cinân
2    Şâd-mân oldı bu gün devr-i kühen-sâl yine / Vuslat-ı Yûsuf ile niteki pîr-i Ken'ân
3    Rûşen oldı açılup dîde-i Ya'kûb-ı emel / Demidür menzil-i 'işret ola Beytü'l-ahzân
4    Ol zamân irdi ki bin şevk ile tâvûs-ı neşât / İde sahn-ı harem-i bâg-ı cihânda cevlân
5    Mehçe-i râyet-i mansûr-ı cihân-efrûzı / Matla'-ı subh-ı zaferden yine oldı tâbân
6    Umaruz kim bulına Ka'be-i maksûda vüsûl / Geçdi çün devlet ile yirlü yirine erkân
7    Devlet ikbâl kılup eyledi tâli' yârî / Hâsılı üstümüze döndi sipihr-i gerdân
8    Nice dem derd ile dem-beste kalup gonca-sıfat / Bagrumuz delmiş idi mihnet-i hâr-ı hicrân
9    Hamdü li'llâh visâl-i Şeh-i ferhunde-hısâl / Kalbümüz açdı yine niteki verd-i handân
10    Güher-i kân-ı kerem nakd-i hayât-ı 'âlem / Rûhdur cismi cihân milketine hükmi revân
11    Hâfız-ı dîn-î kavî hâmî-i şer'-i Nebevî / Tâyi'-i emr-i Hudâ tâbi'-i nass-ı Kur'ân
12    Husrev-i Cem-'azamet dâver-i Hâkân-satvet / Belki en kem kulı Cem 'abd-i hakîri Hâkân
13    Dâver-i devr-i zamân Şâh Süleymân ol kim / Yüz sürer pây-i semendine mülûk-i devrân
14    Şâh-ı Cemşîd-haşem Husrev-i hurşîd-'alem / Ser ü ser-dâr-ı ser-efrâz-ı selâtîn-i zamân 
15    Hâk-i râhı güher-i tâc-ı selâtîn-i cihân / Ayağı toprağıdur sürme-i 'ayn-ı a'yân
16    Tâc-dârân-ı cihân sâye-nişîn-i 'alemi / Ser-firâzân-ı memâlik yolına ser-bâzân
17    Güher-i tâcı ziyâsıyla memâlik rûşen / Hançer-i 'adli cilâsıyla cihân pür-leme'ân
18    Harem-i kadrine bir günbed-i zer-kâr felek / Ana bir tâk-ı murassa' kemer-i kâh-keşân
19    Âteş-i şu'le-i şemşîr-i cihân-tâbından / Küfr ü ilhâd kütüb-hânesin itdi sûzân
20    Tâc-dârâ başına teng ola tâc-ı Dârâ / Hidmet-i hâk-i derün bilmez ise rif'at-i şân
21    Felek-i saltanatun seb'a-i seyyâresidür / Kâm-kârâ o yedi ser-'alem-i nûr-efşân
22    Eyledi leşger-i mansûrun o bayraklar ile / Vâdî-i nusret ü deşt-i zaferi lâle-sitân
23    Gâzîler pây-i semendin yine hınnâladılar / Hûn-ı a'dayı o dem k'eylediler seyl-i revân
24    Tôp idüp kellelerin 'arsada tîgun dâyim / Düşmen-i dîni bu üslûba kılur ser-gerdân
25    Ser-i a'dânı boyar kana dem-â-dem kılıcun / Anlara halk anun'çün didiler sürh-serân 
26    Lutf-ı Hakk ile bu gün oldı eyâ kân-ı kerem / Bir nice fazl senün şân-ı şerîfünde 'ayân
27    'Adl ü dâd-ı 'Ömer ü sıdk u safâ-yı Sıddîk / 'İlm ü 'irfân-ı 'Alî hilm ü hayâ-yı 'Osmân
28    Sana Kisrîyi 'adâletde mu'âdil tutsam / Fazladur sende olan devlet-i dîn ü îmân
29    Ravza-i dîn ü çemen-zâr-ı şerî'at olalı / Matar-ı lutfun ile milket-i Rûm âbâdân 
30    Menzil-i zendeka vü mecma'-ı ilhâd olalı / Sarsar-ı kahrun ile hıtta-i Îrân vîrân 
31    Mahv olupdur ser-i şemşîr-i cihân-gîrün ile / Levh-i 'âlemde olan nakş-ı dalâl u tugyân
32    Halk râhatda sehâb-ı keremün feyzinden / Belî uyhu getürür tab'a hevâ-yı bârân
33    Bâreka'llâh zehî Pâdişeh-i 'âdil kim / Şarkdan garba degin buldı cihân emn ü emân
34    Levhaşa'llâh zehî saltanat-ı kâhire kim / Kâfdan Kâfa cihân cümle mutî'-i fermân
35    'Arsa-i medh ü senânun bulımaz pâyânın / Peyk-i endîşe eger bin yıl olursa pûyân
36    Oldı vasf-ı suhan-ârân ile şi'r-i Bâkî / Rif'at-i pâyede hem-sâye-i nazm-ı Selmân
37    İrdi Selmâna sözi şi'ri kemâlin buldı / Lutfuna kaldı eyâ husrev-i sâhib-dîvân
38    Bahr-i nazm içre bu gün dürr-i girân-mâye iken / Hâk-i zilletde kalupdur nitekim gevher-i kân
39    Hâkden kaldur eyâ dâver-i dîn-perver kim / Nushadur cümle ser-â-pây Hadîs ü Kur'ân
40    Serverâ devr-i felekden yine şekvâmuz var / Tapunâ 'arz idelüm ruhsat olursa el-ân
41    Muktedâ-yı 'ulemâ Hazret-i Kâdî-zâde / Ma'din-i fazl u hüner menba'-ı 'ilm ü 'irfân
42    Ol zamân kim birisin medrese-i 'âliyenün / Eyledün ana kemâl-i keremünden ihsân
43    Bu tarîkun nice yıl künc-i medârisde yatup / Elemin çekmiş iken her birümüz nice zamân
44    Şeref-i hidmetine yüz süre geldük gûyâ / Cûylar kim olalar tâlib-i bahr-i 'ummân
45    'Arsa-i bahse girüp cevherümüz 'arz itdük / Tîg-veş her birümüz şimdi kalupdur 'uryân
46    Zillet ü mihnet ile şimdi tamâm üç yıldur / Yaturuz zâviye-i hücrede bî-nâm u nişân
47    İrdiler pâye-i a'lâya ser-â-ser emsâl / Buldılar mertebe-i 'âliye cümle akrân
48    Ne revâdur fuzalâ kala kıbâb altında / Kim görüpdür k'ola deryâyı habâb içre nihân
49    Mihnet-i fakr belâ gayret-i akrân müşkil / Fukarâ bendelerün arada deng ü hayrân
50    Bir yıl emrünle binâ hidmetine nâzır olup / Gördük ol maslahat-ı hayrı bi-kadri'l-imkân
51    Bu fakîr anda turup hidmete meşgûl oldum / İtmeyüp zerrece sa'yinde kusûr u noksân
52    Hâsılı cûd u kerem vakti irişdi şimdi / Lutfuna nâzıruz ey Pâdişâh-ı 'âli-şân
53    Sûz-ı dilden bu kadar yanmaz idüm hidmetüne / Câna kâr eylemese âteş-i dâg-ı hirmân
54    Merhamet mevsimi ihsân demidür sultânum / Lutf kıl her ne ise devletüne lâyık olan
55    Bezl ile az ola mı ni'met-i cûd u keremün / Yimeden eksile mihvân-ı Halîlü'r-Rahmân
56    Ser-verâ tevsen-i eyyâm katı ser-keşdür / Ana lutf eyle inen eyleme irhâ-yı 'inân
57    Emr-i 'âlî yine der-gâh-ı mu'allânundur / Hele biz eyleyelüm vâki'-i ahvâli beyân 
58    Zehre-i çûn u çirâ kimsede yokdur hâşâ / Südde-i devletünündür yine bâkî fermân
59    Her seher tâ ki nücûm üzre niyâm-ı şebden / Çıkara tîg-i cihân-gîrini mihr-i rahşân
60    Kılıcun üstün ola niteki tîg-i hûrşîd / Sâye-i saltanatunda ola âsûde cihân