003 - Der-medh-i belâgat-'unvân-ı Sultân Süleymân Hân

1    Hat-ı müşg-fâmunla ey gonca-i ter / Şekerdür o lebler mümessek mükerrer
2    Ne zîbâ yaraşmış o leblerle dendân / Ne hûb imtizâc eylemiş şîr ü şekker
3    Gönül nakdini aldı 'ayyâr-ı gamzen / Gamundan virüp câna dârû-yı hûş-ber
4    Egerçi ser-âmed geçer şâh-ı sünbül / Mu'anber saçunla kaçan ola hem-ser
5    Tolar bûy-ı müşgîn-i zülfünle 'âlem / Döner nâfe-i miske çarh-ı müdevver
6    Meger çîn-i zülfünde pinhân olupdur / Gubâr-ı der-i Şehr-iyâr-ı muzaffer
7    Cihân-ı kerem Hân Süleymân-ı Gâzî / Şeh-i âsmân-taht u hûrşîd-efser
8    Hudâvend-i kâmil şehenşâh-ı 'âdil / Cihân-dâr-ı mukbil şeh-i dâd-güster
9    Vücûd-ı şerîfiyle dünyâ müşerref / Zamîr-i münîriyle 'âlem münevver
10    O Şâh-ı felek-kadr kim der-gehine / Mülûk-i cihân bende 'âlem musahhar
11    Rikâbında kürsî gerek tâc-ı Kisrâ / Ola şol zamân kim süvâr-ı tek-âver
12    Mülûk-i zamâne önünce revâne / Rikâb-ı hümâyûnda Hâkân u Kayser
13    Ne yana buyursa revâdur getürmek / Devâtın Aristô silâhın Sikender
14    Eğer peyk olurlarsa lâyık önince / İnüp tâc-ı zerrîn ile heft ahter
15    Saçar bezme nûrı döker rezme nârı / O tâc-ı murassa' o tîg-i mücevher
16    Hat-ı nazm-ı pâki çemen-zâr-ı cennet / Elinde kalem çeşme-i âb-ı Kevser
17    Buhâr-ı bahûrıyla 'âlem dimâgın / Kılupdur mu'attar o kilk-i mu'anber
18    Zamân-ı kitâbetde kilk ü mürekkeb / Elinde olur var ise 'ûd u 'anber
19    Nazar ehline mîl-i kuhlü'l-cevâhir / Reg-i cân-ı bed-hvâha nebtîz ü nişter
20    Nesîm-i revân-bahş-ı subh-ı safâdan / Suhan gül-şeninde hırâman sanavber
21    O güftâr-ı mevzûn u reftâr-ı dil-keş / O sîmâ-yı matbu'u bâlâ-yı hôş-ter
22    Selâtîne dîvân olur çünki lâzım / N'ola kılsa tertîb-i dîvân u defter
23    Debîr-i felek yazmağa vâridâtın / Eşi''a getürmişdür altun kalemler
24    Yazınmaga mânend-i nazm-ı Süreyyâ / Varaklar zer-efşân ider çarh-ı ahdar
25    Yanar şem'-i Nâhid öninde şihâbun / Çeker her gice subha dek cedvel-i zer
26    Ana cild-i garrâ müzehheb mutallâ / Meh-i 'âlem-ârâ vü hûrşîd-i enver
27    Suhan matla'ından güneş gibi togsun / Kosunlar şerîf adını genc-i gevher
28    Fesâhat gül-istânı içre dem-â-dem / Su gibi revân ide bülbüller ez-ber
29    Senâsında Bâkî-sıfat ola 'âciz / Hezârân ola 'andelîb-i suhan-ver
30    Du'â idelüm rûy-ı ikbâl u bahtı / Dem-â-dem ola gül gibi tâze vü ter
31    İlâhî be-âb-ı ruh-ı âl-i Ahmed / Be-nûr-ı cebîn-i mübîn-i Peyem-ber
32    Be-dîn-i güzîn-i Nebiyy-i mükerrem / Be-rûh-ı revân-ı Rasûl-i mutahhar
33    Ümîdin revâ eyle 'ömrin ziyâde / Mühimmin müheyyâ murâdın müyesser