004 - Der-imzâ'-i Dîvân-ı Sultân Süleymân Hân

1    Cihân-ı ma'delet kân-ı mürüvvet / Penâh-ı mülk ü millet nusratü'd-dîn
2    Şeh-i 'âdil Süleymân Hân-ı Gâzî / Mu'izzü'd-devle sultânü's-selâtîn
3    Ne hôş kıldı görün âsâr-ı lutfı / Cihân-ı sûret ü ma'nâyı tezyîn
4    Virüp fazl u kemâli husrevâne / Ma'ânî mülkine tertîb ü âyîn
5    Yine nazm eylemiş bir 'ıkd-ı gevher / İder bin kerre Hassân görse tahsîn
6    Misâl-i hurde-i pîrûze hattı / Mücellâ safhası bir levh-i sîmîn
7    Ya hod zîbâ ter ü tâze benefşe / Der-âgûş eylemiş gül-berg-i nesrîn
8    Beyâzı gurre-i subh-ı sa'âdet / Sevâdı sürme-i çeşm-i cihân-bîn
9    Sevâd-ı hatt içinde noktalardan / Şeb-i târîk içinde şekl-i Pervîn
10    Egerçi noktadur sûretde anlar / Veli ma'nâ yüzinde hâl-i müşgîn
11    Edâsı Selsebîl-i bâg-ı Rıdvân / Hurûfı ravzadan gelmiş reyâhîn
12    Ne deryâdur bu şi'rün bahri yâ Rab / Ki andan kâ'inât olmış güher-çîn
13    Nice nâzükdür ol şi'r-i şeker-bâr / Leb-i dil-ber gibi şîrîn ü rengîn
14    Pes-i âyîne-i tab'ından itdi / Yine tûtî-sıfat Bâkîye telkîn
15    Şikâr itmek nedür ma'nâ hümâsın / Bulınsa tab'-ı şâhî gibi şâhîn
16    Kemâlin anlayup bir bir öninde / Komışlar yüz yire şâhân-ı pîşîn
17    Cihânda geydügince şâh-ı encüm / Zümürrüd tahtı üzre tâc-ı zerrîn
18    Hudâ virsün serîr-i saltanatda / Sa'âdet tâcı birle 'izz ü temkîn
19    Belâlardan emîn olsun cihânda / İlâhî izzetün hakk içün âmîn