005 - Der-cülûs-i Sultân Selîm Hân

1    Bi-hamdi'llâh şeref buldı yine mülk-i Süleymânî / Cülûs itdi sa'âdet tahtına İskender-i sânî
2    Togup gün gibi zerrîn tâc ile burc-ı sa'âdetden / Yitişdi şarkdan garba ziyâ-yı 'adl u ihsânı
3    Beşâretler zemîne âsmânun gözleri aydın / Cihânı rûşen itdi pertev-i envâr-ı Yezdânî
4    Perî gözden nihân olmak ne mümkindür zamânında / Cihânı şöyle nûrânî kılupdur rûy-ı rahşânı
5    Metâ'-ı ma'rifet geldi revâcın buldugı demler / Zer-efşân eylesün nergisler evrâk-ı gül-istânı
6    Biraz uyhu yüzin görsün felekde dîde-i encüm / Ki çeşm-i baht-ı bî-dârı yiter dehrün nigeh-bânı
7    Hudâvend-i cihân sultân-ı 'âdil şâh-ı deryâ-dil / Ser-efrâz u serîr-efrûz-ı tâc u taht-ı sultânî
8    Penâh-ı dîn ü devlet pâdişâh-ı âsmân-rif'at / Cenâb-ı Şeh Selîm ibni Süleymân Hân-ı 'Osmânî
9    Şehenşâh-ı hümâyûn-tâli'u ferhunde-tal'atdur / Cihân-ı saltanatda ol sa'âdet tahtınun hânı
10    Elinde Hazret-i Dâvûdun âhendür ki mûm oldı / Ziyâ-bahş olsa âfâka n'ola şemşîr-i bürrânı
11    Su gibi nâr-ı kahrından erîr bir demde Rûyîn-ten / Tokınsa şu'le-i şemşîri nerm eyler Nerîmânı     
12    İner Seyf âyeti gibi ser-i a'dâya şemşîri / Hadîs-i tîg-i pulâdın nice şerh ide Kirmânî
13    'Alevlerdür duhân içre görinür tîgler gûyâ / Ne dem gerd-i siyâhı rezm-gâhı kılsa zulmânî
14    İderler reh-nümâlıklar 'adem mülkine a'dâya / Guzâtun ellerinde nîzeler şem'-i şeb-istânî
15    Müselles gösterür dâyim temaşa eylesen elde / Meger kim pâre-i elmâsdur câm-ı dırahşânı
16    Hudâvendâ sen ol çâpük-süvâr-ı mülk ü devletsin / Ki rahş-ı himmetün evvel kademde aldı meydânı
17    Semender-veş semendün yanar od içre atar kendin / Su gibi akıdur degse şirâr-ı na'li sindânı
18    Felekler farkına basdı kadem devründe fazl ehli / Nice pâ-mâl ide dünyâ-yı fânî ehl-i 'irfânı
19    Kef-i cûdun keremler kim kılupdur ehl-i 'irfâna / Ol ihsanı gül ü nesrîne kılmaz ebr-i nîsânî
20    Sehâ resminde haddinden tecâvüz eylemez deryâ / Kef-i cûdun taşar gatmaz kerem vaktinde 'ummânı
21    Perîşân itmedi devründe hergiz kimseyi kimse / Meger meclisde yârân-ı safâ gül-berg-i handânı
22    Kafâ-dâr oldılar şîr ü peleng âhûya sahrâda / İderler şol kadar şimdi ri'âyet hakk-ı cîrânı
23    Felek gırbâl ile zer buldı dirler hâk-i râhunda / Miyân-ı hâlede seyr eyleyenler mâh-ı tâbânı
24    Ana her gûşeden bir ta'ne taşın kondururlardı / Nigînünle mu'ârız görseler mühr-i Süleymânı
25    Sabâ gibi güzâr itdüm seher gül-zâr-ı medhünde / Bu ebyâtı terennüm kıldı bir mürg-i hôş-elhânî
26    Nihâl-i hôş-hırâmundur cihân gül-zârınun bânı / Müsellemdür sana âyîn ü üslûb-ı cihân-bânî
27    Cünûnın gördiler cûlar nihâl-i sîm-sîmânâ / Gümiş zencîr ile bend itdiler serv-i hırâmânı
28    Gedâ-yı âsitânun âsmâna ser-fürû kılmaz / Begenmez hâsılı kem-ter kulun eyvân-ı Keyvânı
29    Senâ-h^vânun olurdı mâh-ı Ken'ân tal'atun görse / Sana Yûsuf diyeydi iller ana Yûsuf-ı sânî
30    Getür câm-ı sürûr-encâmı ey sâkî yiter çekdük / Cefâ-yı devr-i gerdûnı belâ-yı çarh-ı gerdânı
31    Benem ol 'âşık-ı şûrîde kim turmaz revân eyler / Dilinden Âb-ı hayvânı gözinden dürr-i galtânı
32    Zuhûr itdi Zahîrün sırrı tab'-ı nükte-dânumda / Akıtdı kendüye şi'rüm revân-ı pâk-i Selmânı
33    Belâgat kûsın urdum husrevâne heft kişverde / Suhan menşûrına çekdüm bu gün tugrâ-yı Hâkânı
34    Egerçi pîr-i dânâdur gönül fenn-i belâgatda / Velî olmaz deb-istân-ı senânun tıfl-ı nâ-dânı
35    Nisâr-ı şaha lâyık mümkin olsa bir güher bulmak / Kazardum tîşe-i endîşe birle kân-ı imkânı
36    Du'â-yı devlet-i şâh-ı cihâna başla ey Bâkî / Hudâ pâyende kılsun tâc u taht-ı zıll-ı Yezdânı
37    Zümürrüd tahtına çıkdukça şâh-ı leşger-i encüm / Cihanı efser-i zerrîn ile kıldukça nûrânî
38    Ser-efrâz ol serîr-i saltanatda gün gibi dâyim / Münevver kılsun ikbâlün bu nüh fîrûze eyvânı
39    Ziyâ-bahş ol rikâbun şu'lesinden mâh u hûrşîde / Semend-i bahtun itsün 'arsa-i 'âlemde cevlânı