006 - Der-medh-i Sultân Murâd Hân 'aleyhi'r-rahmeti ve'l-gufrân berây-ı tehniye-i kudûm-ı ciger-gûşe-i Şâh-ı 'Acem

1    Râh-ı çeşmümden dile tâb-ı ruh-ı cânân gelür / Hâne-i cana ziyâ-yı mihr-i nûr-efşân gelür
2    Vasl-ı yâra cân ile oldur hırîdâr oldugum / Gelse bin nakd-i revâne bir demi erzân gelür
3    Bâğ-bân-ı gül-şen-i 'aşkun olan 'âşıklara / Dâgı gül dûd-ı kebûdı sünbül ü reyhân gelür
4    Nûş-ı cân eyler gönül cem'iyyet-i hâtır bulur / Târumâr eyler yine ol gözleri mestân gelür
5    Câm-ı gül-gûn nûş ider hûn-âbe-i eşkin döker / Benzine bir pâre 'âşık derd-mendün kan gelür
6    Senden ayrılmak katı müşkil belâdur dôstum / Yoluna ölmek egerçi 'âşıka âsân gelür
7    Bulsa câm-ı la'l-i cân-bahş-ı lebünden cür'a hâk / Hâk içinde mürde-i sad-sâle cisme cân gelür
8    Sâdıkam cândan bana 'aşkun 'azîz oldı disem / Sanma girçek 'âşıkundan dôstum yalan gelür
9    Cânuma canlar katar gelse peyâm-ı vasl-ı yâr / San nesîm-i lutf-ı Şâhenşâh-ı 'âlî-şân gelür
10    Hân Murâd ol kâ'inâtun kıble-i ikbâli kim / Ka'be-i der-gâhına şâhân u dervîşân gelür
11    Şehr-i dârü'1-mülk-i 'adlin seyr iden 'âriflere / Hıtta-i ma'mûre-i 'âlem dih-i vîrân gelür
12    'Âleme çekdi simât-ı ni'met-i bî-minnetin / Şâhlar şeh-zâdeler der-gâhına mihmân gelür
13    Âsitânı hâkini kıldı Kırım hânı konak / İrte bir gün seyr idün hâkân-ı Türk-istân gelür
14    Bir hatâ zann eyleyüp ebrûların çîn eylese / Cân atar der-gâhına Fagfûr ile Hâkân gelür
15    Perçem-i tûgından irdükçe Freng-istâna tâb / Sâye-i serv-i bülend-i kaddin özler bân gelür
16    Şâd-mân olsun 'Acemler gözleri aydın yine / Mîr Haydar nûr-ı çeşm-i husrev-i Îrân gelür
17    Kanı ol gelmez diyü bahs eyleyen câhilceler / Hak budur kim 'âkıle anlar katı nâ-dân gelür
18    El süvâr oldı kümeyt-i hâmeye şimden girü / Sanma Bâkî gibi şâhâ fâris-i meydân gelür
19    Şimdi gûş-ı cân ile dinler cihân eş'ârumı / Medhün itsem bir yire mecmû'-ı ins ü cân gelür
20    Okudukça na'tunı her gûşeden gûş itmege / Cân-ı Selmân rûh-ı pâk-i Hazret-i Hassân gelür
21    Bî-nihâyet lutfuna lâyık edâ mümkin degül / Gerçi ma'nâ hâtıra bî-hadd ü bî-pâyân gelür
22    'Arsa-i sîmîn-i subh üstinde dâ'im gûy-ı zer / Tâ ham-ı çevgân-ı gerdûn içre ser-gerdân gelür
23    Hasm-ı gerden-keş izün tozına kılsun ser-fürû / Ser-fürû kılmazsa bir gün kellesi galtân gelür