007 - Bahâriyye der-medh-i Sultân Murâd Hân 'aleyhi'r-rahmeti ve'l-gufrân

1    Micmer-i zerrin-i mihri çarh gerdân eyledi / 'Ûd u 'anber kıymetin bûy-ı gül erzân eyledi
2    Bülbül-i şûrîde-dil kıldı niyâz-ı 'âşıkân / Gonca-i gannâc nâz-ı nâzenînân eyledi
3    Çıkdı bir yirden sadâ vü şît-ı mürgân-ı çemen / Gûyiyâ etfâl-i mekteb hatm-i Kur'ân eyledi
4    Mehd-i gül-zâr üzre geldi dâye-i ebr-i bahâr / Tıfl-ı gonca agzın açdı meyl-i pistân eyledi
5    Tagılup cünd-i şitâ feth oldı mülk-i bâg u râg / Leşger-i ebr-i bahârî tîr-bârân eyledi
6    'Irkını kat' eyledi cünd-i şitânun nev-bahâr / Berg-i sûsen hidmet-i şemşîr-i bürrân eyledi
7    Nevbet-i sûr u sürûr oldı tonandı her nihâl / Nahl-bend-i nev-bahâr eşkâl u elvan eyledi
8    Nev-'arûs-ı gül gibi pîrâhen-i âl üstine / Lâle dürr-i jaleden gûy-ı girîbân eyledi
9    Her yana mektûb uçurdı bâd-ı nev-rûzî yine / Berg-i nesrîni kebûter gibi perrân eyledi
10    Jale kıldı her kenârı sâhil-i bahr-i 'Aden / Lâle hâk-i gül-şeni kân-ı Bedahşân eyledi
11    Zülf-i dil-ber bendine düşmiş gibi âşüfte-hâl / Sünbül-i miskîn 'aceb kendin perîşân eyledi
12    Lâle çâk-i pîrehen gösterdi gül çînî kabâ / Bülbül-i şûrîde hây u hûy-ı mestân eyledi
13    Yakdılar nergisleri etrafa saçıldı şirâr / Bâd âteş-bâzlar gibi gül-efşân eyledi
14    Lâle hâven yakdı sûsen âsmânîler yine / Şâh-ı gül taht-ı zümürrüd üzre seyrân eyledi
15    Tutdı etrâfın benefşe mülk-i Mısra döndi bâg / Sandılar seyr eyleyenler Nîl tugyân eyledi
16    Devr-i gül sanman cihânı böyle tezyîn eyleyen / Yümn-i ikbâl-i Hudâvend-i cihân-bân eyledi
17    Şâh-ı 'âdil Hân Murâd ol kim nesîm-i 'adl ile / Lutfı bâg-ı 'âlemi reşk-i gül-istân eyledi
18    'Âlemi gül gibi handân itdi devr-i devleti / 'Ahd-i 'adli i'tidâl-i mâh-ı nîsan eyledi
19    Zûr-ı dest-i devleti gürz-i girân-ı satveti / Düşmen üzre hamle-i Sâm u Nerîmân eyledi
20    Sillesiyle kendüye geldi şecâ'at lâ-cerem / Düşmen-i dîne hücûm-ı şîr-i garrân eyledi
21    Tâ'atinde baglayup mânend-i Keyhusrev kemer / Hâkim-i Îrân kabûl-i pend-i pîrân eyledi
22    'Abd-i Memlûkî gibi hâk-i cenâbı hıdmetin / Seyyid-i sâhib-velâyet Hân-ı Gîlân eyledi
23    Turmadı çekdi Sıfâhân semtine bâd-ı sabâ / Hâk-i payın sürme-i eşraf u a'yân eyledi
24    Bâkîye ez'âfın ihsân eyledi eltâf-ı şâh / Ol kerem kim Şeh Selîm ü Hân Süleymân eyledi
25    Anlar itdi hâkden eflâke gerçi ser-fırâz / Menzilin şâh-ı cihân eyvân-ı Keyvân eyledi
26    Hıdmet-i hâk-i cenâbından gelen kadr ü şeref / Ser-firâz-ı ehl-i dil mümtâz-ı akrân eyledi
27    Husrevâ sen ser-veri ol şâh-ı şâhân eyleyen / Ben kulun erbâb-ı tab'a mîr-i mîrân eyledi
28    Şeb-çerâg-ı zulmet-i zulm eyledi şemşîrûni / Çarh-ı gerdan tîgun elmâsın dırahşân eyledi
29    Matla'-ı subh-ı zaferden şâhid-i nusret yüzin / Gün gibi âyîne-i tîgun nümâyân eyledi
30    Cümle yek-dildür du'â-yı devletünde kâ'inât / Halk ikbâl-i cenâb-ı pâk-i Yezdân eyledi
32    Secde-gâh itsün cihâna hâk-i der-gâhun o kim / Âsitânun kıble-i ikbâl-i şâhân eyledi