008 - Dökilmiş zülf-i müşg-âsâ o kadd-i dil-sitân üzre

1    Dökilmiş zülf-i müşg-âsâ o kadd-i dil-sitân üzre / Döşenmiş sâye-i Tûbâ bihişt-i câvidân üzre
2    Ten-i pâki 'arak-rîz olmış ol serv-i gül-endâmun / Dökilmiş katre-i şeb-nem nihâl-i ergavân üzre
3    Gören bezm-i mahabbetde vücûdum nahl-i gül sandı / Ser-â-pâ taze dâgumdan bu cism-i nâ-tevân üzre
4    Hamâ'il gibi dâ'im dâg-ı derdüm 'âşık-ı bî-dil / Kosun baş üstine dirse n'ola va'llâhi cân üzre
5    'İzâr-ı nâzenînin pür-gubâr-ı müşg-i Çîn itmiş / Yüz urmış hâk-i pây-ı husrev-i sâhib-kırân üzre
6    Harîm-i cân u dilde tâb-ı hüsnünden nişân virdi / Safâ-yı tal'at-ı nev-rüz bâg u bûstân üzre
7    Gönül bâg-ı cihânda ârzû-yı berg-i 'ayş eyler / Felek mahz-ı hayât-ı bî-sebâta imtinân üzre
8    Cihân-ı ma'delet kân-ı mürüvvet Hân Murâd ol kim / Vücûdı sâye-i lutf-ı İlâhîdür cihân üzre 
9    Nişân-ı baht u devlet gevher-i kân-ı sa'âdetdür / Gubâr-ı na'l-i esbi tâc-ı fark-ı husrevân üzre
10    Dili dürr-i ma'ârifden kefi bezl-i 'avârifden / Dem-â-dem eyler isbât-ı fazilet bahr u kân üzre
11    Memâlik zıll-ı rif'atde halâ'ik hvâb-ı râhatde / Cihân âsûde 'adlinde zamân emn ü emân üzre
12    Zamâne âteş urdı hırmen-i a'dâ-yı bed-kîşe / Düşelden şu'le-i şemşîri Azerbâycân üzre
13    Hirâsân oldı a'yân-ı Horâsân gözlerin açdı / Sabâ gerd-i siyâhın sürmesiyle İsfahân üzre
14    Dilerse akıdur âb-ı revânı hâk-i Tebrîze / Dilerse hâk-i Tebrîzi döker âb-ı revân üzre
15    Du'â-yı devletinden sonra vâcib sana ey Bâkî / Tevekküldür Hudâvend-i zemîn ü âsmân üzre