009 - Der-tehniye-i cülûs-ı Sultân Mehemmed Hân

1    Minnet Cenâb-ı Hakka dem-â-dem hezâr bâr / Fasl-ı şitâda bâg-ı cihân buldı nev-bahâr
2    Gün gibi tâc-ı devlet-i şâhî tülû' idüp / Kevn ü mekâna virdi ziyâ âfitâb-vâr
3    Hürşîd gibi pertev-i cüd u sehâ ile / Rüy-ı zemîne saçdı zer-i kâmilü'l- 'ayâr
4    Kıldı zemîni berf gibi nakdi sîme gark / İn'âm-ı 'âm-ı şâh-ı cevân-merd-i baht-iyâr
5    Deryâ-yı keffi mevc-i 'atâ urdı şöyle kim / Yek bâr sîm-i nâb ile zeyn oldı her kenâr
6    Berg-i gül-i sefîdi yolup bâg-bân-ı çarh / Mânend-i berf yollarına eyledi nisâr
7    Allâh ki dökdi saçdı felek halka varını / Şükrâne-i cemâl-i cihân-bân-ı şehr-iyâr
8    Ol âsitânı kıble-i ikbâl u baht olan / Sultân Mehemmed a'zam-ı şâhân-ı tâc-dâr
9    Farkında tâc-ı devlet ü ikbâl ser-firâz / Tahtında taht-ı 'izzet ü baht eyler iftihâr
10    Dârâ reva ki gâşiyesin ala dûşına / Lâyık budur ki ola Sikender rikâb-dâr
11    'İlmi katında bahre niçün dinile muhît / Hilmi yanında kûha neden nisbet-i vekâr
12    Nusret yüzini oldı nümâyende 'âleme / Âyîne-veş elinde o şemşîr-i âb-dâr
13    Hâlî degüldi zelzeleden 'arsa-i zemîn / Evvel kademde virdi cihân mülkine karâr
14    Saff-ı gazâda râyet-i ikbâli pây-merd / Rûz-ı vegâda kabza-i şemşîri dest-yâr
15    Eyler hücûmı düşmen-i dîne 'Alî-sıfat / Şemşîr-i hûn-feşânı kılur kâr-ı Zü'1-fekâr
16    Şîr-i jeyâna pençe salar gâh-ı hışm u kîn / Bebr-i yabâna karşu varur vakt-i kâr-zâr
17    'Ahdi zamânı emn ü emân-ı cihâniyân / Şâh-ı huceste-tâli'u ferhunde-rûzgâr
18    Devrân basît-i hâke niçün saldı ferş-i sîm / Devrinde tâ ki irmeye bir hâtıra gubâr
19    Dâg-ı vefâ vü mihri gönülde şügüfte gül / Tîr-i hadengi cân-ı 'adûda şikeste hâr
20    Bâkî du'âcı pir kulun geldi husrevâ / Eyler cenâb-ı hazretüne 'arz-ı iftikâr
21    Mevrûsdur cenâbuna memlûk tapuna / Lâyık degül ki devr-i zamân ide hvâr u zâr
22    Destinde hâme fazl u belâgat nihâlidür / Medh ü senâ-yı şâh-ı cihân ana berg ü bâr
23    Ümmîd o kim du'âna ola mûcib-i kabûl / Sûz-ı derûn u derd-i dil ü çeşm-i eşk-bâr
24    Her kanda 'azm idersen ola reh-ber ü refîk / Tevfîk-i Rabb-i 'izzet ü te'yid-i Kirdigâr
25    Eyyâm-ı 'ömr ü devlet ü iclâl müstedâm / Bünyâd-ı baht u 'izzet ü ikbâl üstüvâr