010 - Der-şikâyet ez rûzgâr-ı gaddâr

1    Kadr-i eşküm ol bilür kim kıymet-i gevher bile / Rûy-ı zerdüm hôş görür şol kim 'ayâr-ı zer bile
2    Nefha-i 'anber tutar zülfı hamından 'âlemi / Kanda gitse iki yanında iki micmer bile
3    Sâye-i kaddünde âhum başka sancak çekdügin / Tuydı hep mîr-i livâ belki şeh-i kişver bile
4    Sûz-ı 'aşkundan dimâgum şol kadar âşüfte kim / Mey degül âsûde kılmaz dârû-yı hüş-ber bile
5    Küşte-i şemşîr-i 'aşkun hâkden kaldursalar / Teng ola sahrâ-yı 'âlem 'arsa-i mahşer bile
6    Cân virür çokdur ser-i kûyunda kurbân olmaga / Hâzır it şemşîr-i bürrânunla bir hançer bile
7    Tâb-ı dilden ahker-i sûzâna döndi gözlerüm / Bu meseldür kim yanar huşkün yanınca ter bile
8    İnkisâr-ı bâl ile zehr-i gam itse telh-kâm / Şehd şîrîn itmez agzın 'âşıkun sükker bile
9    Bâkıyâ çarh-ı sitem-kârun ne cevr itdüklerin / Yek-be-yek 'arz it ki şâh-ı ma'delet-güster bile
10    Hayli demdür hırka rehn-i hâne-i hammârdur / Havfum oldur ki ola dîvân ile defter bile
11    Korkaram çâpük-süvâr-ı 'arsa-i eirfân iken / Esb nâ-geh bir gice bî-cev kala ester bile
12    Âsitânı hâkine muhtâç mutlak hâs u 'âm / Yalunuz kullar degül tahtında sultânlar bile
13    Cânına minnet bilür Dârâyı der-bân eylese / Hak bu kim Dârâ degül yanınca İskender bile
14    Vâsıl olmaz pâye-i na'l-i semend-i kadrine / Efser-i Hâkân degül tâc-ı ser-i Kayser bile
15    Eşheb-i zerrîn-sitâm-ı bahtı cevlân eylesün / Nüh felek tâ devr ide âfâkı heft ahter bile