020 - Der-sitâyiş-i Kubâd Pâşâ

1    Ne hôş yaraşdı sipihre kevâkib içre hilâl / Takında pâyine gûyâ ki cevherî halhâl
2    Tulû' idince ufukdan miyân-ı encümde / Takıldı gerden-i gerdûna sanki 'ıkd-ı le'âl
3    Çerâg-ı mâha yine bir filori dikdi güneş / Gören kimesne kenârın meh-i nev itdi hayâl 
4    Şu sîb şekline girdi şafakda cirm-i kamer / Güzellenüp ola bir yanı sarı bir yanı al
5    Sarındı meh yine bir hûb Yûsufî destâr / Sokındı farkına bir dâne ince sîm hilâl
6    Elinde mutrıb-ı çarhun ya kurs-ı meh defdür / Kenâresi görinür pûlınun misâl-i hilâl
7    Ne hokkadur bu ki altında çarh-ı şu'bede-bâz / Koyınca mühre-i mihri güm eyledi fı'l-hâl
8    Nedür bu kurs-ı nuhâsî ki zer-ger-i gerdün / Salup bu pûteye nâr-ı şafakda eyler kâl
9    Ya câm-ı 'işret-i Dârâ ya tâc-ı Kisrâdur / Tolaşdurur bu cihânı sipihr olup dellâl
10    Kanadı gûşesidür âşiyâneden görinür / Feraga vardı meger şâh-bâz-ı zerrîn-bâl
11    Ya nûndur görinür âhırında Şa'bânun / Ya râdur ol Ramazân evveline olmış dâl
12    Götürdi perdeyi gözden görindi halka-i der / Bu gice gök kapusın açdı Bârî-i Müte'âl
13    Gelün bu fikri koyalum tereddüd itmeyelüm / Bu denlü nesne niçün ola pây-ı 'akla 'ıkâl
14    Hemân bu hançer-i zerrîn-gılâf-ı Pâşâdur / Ki tâk-ı 'arşa asıldı bu şeb hilâl-misâl
15    Emir-i şâh-nazar dâver-i bülend-ahter / Vezîr-i hûb-siyer hvâce-i huceste-hısâl
16    Bülend-himmet-i devrân Kubâd Pâşâ kim / Hilâl-i çarha mahal meclisinde saff-ı ni'âl
17    O kim debîr-i ezel çekdi kilk-i kudretle / Şerîf nâmına tevkî' -nâme-i ikbâl
18    Revâk-ı manzar-ı dîvânı tâk-ı eyvânı / Hilâl-i burc-i sa'âdet sipihr-i câh u celâl
19    Nesebde payesi a'lâ hasebde bî-hem-tâ / Keremde ana ne akrân sehâda ne emsâl
20    Sehâda Hâtem-i Tay defterini tayy itdi / Gazâda Seyyid-i Gâzî hikâyetin battâl
21    Kef-i cevâdı pür eyler sehâb dâmânın / Sehâb egerçi virür dâmen ile vakt-i nevâl
22    Dem-i vegâda çü pây-i semendi deprense / Sipihre lerze düşer arza irişür zilzâl
23    Nesîm-i hulkına bir dem karîn olursa eger / Suyı gül-âb ide topragı müşg bâd-ı şimâl
24    Misâl-i cûdına 'unvan yazar debîr-i felek / Mürebbî-i fuzalâ dest-gîr-i ehl-i kemâl
25    Eger ki hil'at-i lutfın kılayda erzânî / Siyâh şâlını terk ide geymeyeydi leyâl
26    Kef ile gerçi terâzû-yı 'akla urmış idüm / Hafîf geldi katı keffe-i sehâb-ı sikâl
27    'Atâ-yı kân-ı kef-i zer-feşânına nisbet / Nevâl ü feyz-i sehâb-ı sikâl bir miskâl
28    Şahâ'if olsa felekler nihâl-i Sidre kalem / Yazılmaya keremi defteri 'ale'l-icmâl
29    Şu câmı sundı bana ser-verâ bu sâkî-i dehr / Şarâbı zehr ile âlûde dârü-yı kattâl
30    Şarâb-ı hayret ile şöyle mest ü medhûşam / Ne dest-i 'akla tasarruf ne pây-ı fikre mecâl
31    Hemîşe san'at u pîşem dem-â-dem endîşem / Özümle bahs u cedel yılduzumla ceng ü cidâl
32    Kemend-i 'acz ile olmazdı dest ü pâ beste / Bu bendi geçmese bana zamâne-i muhtâl
33    Elündedür çü bu gün hall-i müşkilât-ı enâm / Enâmil-i keremün kıl bu 'ukdeye hallâl
34    Sehâb-ı mekremet ü menba'-ı mürüvvetsin / Nem-i sehân ile ser-sebz gül-şen-i âmâl
35    Bu gül-şen içre seni serv-i ser-firâz görüp / Su gibi ayaguna akdı hâtır-ı meyyal
36    Sezâ-yı merhamet ü müstahıkk-ı 'âtıfetem / Nevâl-i fazlun idersen mahallidür ifzâl
37    Boyandı kanlu yaşum silmedin elüm ale / Ayakda kaldum eyâ ma'din-i kerem elüm al
38    Tapuna yüz süre geldüm safâ-yı hâtır ile / Zülâl gibi beni gül-sitân-ı lutfuna sal
39    Dilümde şekker-i şükr-i fevâzıl-ı keremün / Tapuna arz ide geldüm ne ise mâ-fi'1-bâl
40    Elümde sâgar-ı 'işret emir-i meclis idüm / Zamâne olmasa devr-i edânî vü erzâl
41    Belâgat içre ben ol şeh-süvâr-ı meydânem / Ki eyledüm şu'arâ-yı zamâneyi pâ-mâl
42    Benem bu 'arsada kim rahş-ı tab'ı depredicek / Vücûdı hasm ola pâ-mâl olursa Rüstem-i Zâl
43    'Aceb degüldür eger olsa nükte-i kalemüm / Ser-i 'adû-yı bed-endîşe darbet-i kûpâl
44    Du'âya başla dırâz itme kıssayı Bâkî / Ki fehm olındı muhassal mu'ayyen oldı me'âl
45    El aç du'â-yı kıyâm-ı hıyâm-ı devletine / Yiter uzandı bu denlü tınâb-ı kâl u mekâl
46    Hemîşe tâ meh-i rûze gelüp bu devr içre / Riyâzet ile ire peyker-i hilâle hüzâl
47    Gicen şerefde şeb-i Kadr ü gündüzün bayram / Nevâl ü ni'met ile hvân-ı 'ayş mâl-â-mâl