019 - Kasîde-i Bâkî berây-ı Destûr-ı a'zam 'Alî Paşâ

1    Zer ü gevherle kılup zîver-i efser hâtem / Zîb ü zînetde geçer hem-ser-i Kayser hâtem
2    Nâm ile tutdı cihan mülkin olursa tân mı / Mâlik-i Câm-ı Cem ü tâc-ı Sikender hâtem
3    Meş'al-i mâhdur ol gevher-i şeb-tâb meger / Geçinür çenber-i gerdûn ile hem-ser hâtem
4    İdüp elmâsdan âyîne vü zerden şâne / Gösterür halka yine şîve-i duhter hâtem
5    Fass-ı pîrûze ne hôş yaraşur anda seyr it / Oldı bir tûtîye gûyâ kafes-i zer hâtem
6    Tâ ki bennâ-yı kader yapdı sa'âdet kasrın / Oldı ol tâk-ı felek-rif'ate manzar hâtem
7    Halkadur devr-i kadeh la'l şarâb-ı gül-gûn / Rind-i mey-hvâreye hôşdur tolu sâgar hâtem
8    Reşk-i la'1-i leb-i dil-dâr kurutmış kanın / N'ola ger böyle nahîf olsa vü lâgar hâtem
9    Cismine na'l kesüp farkına bir dâg urmış / Var ise sevdi meger yâr-ı sitem-ger hâtem
10    Vâdî-i 'aşka düşüp taze cevân sevdi meger / Bükdi kaddin nitekim pîr-i mu'ammer hâtem
11    Hasret-i la'l-i leb-i yâr ile tahsîl itmiş / Ten-i lâgar kad-i çenber ruh-ı asfer hâtem
12    Nusha yazdursa 'aceb olmaya bâdâm üzre / Teb-i hicrana 'ilâc eylemek ister hâtem
13    Tavk-ı zerrîn takınup yine kazıtmış kaşın / İhtiyâr eylemiş üslûb-ı Kalender hâtem
14    Bu gül-istânda yiter 'ârife bir gül çünkim / Takmur farkına bir dâne gül-i ter hâtem
15    Beyza-i tâ'ir-i devletdür o dürr-i şeh-vâr / Âşiyân şeklini baglarsa n'ola ger hâtem
16    Göz kulag oldı ser-â-ser gözedür âfâkı / Bulalı kurb-i vezîr-i şeh-i kişver hâtem
17    Gözün üstinde kaşun var dimedi kimse dahı / İdeli hidmet-i Pâşâ-yı dil-âver hâtem
18    Kerem-i keff-i güher-pâş-ı 'Alî Pâşâdan / Buldı zerrîn-kemer ü tâc-ı mücevher hâtem
19    Eli ihsân u 'atâ mevcin urur deryâdur / Ne 'aceb ger ola gark-ı zer ü zîver hâtem
20    Bahr-i eltâf-ı keremdür kef-i gevher-bahsı / N'ola gird-âb-sıfat olsa müdevver hâtem
21    Nice deryâ diyemem keff-i güher-rîzine kim / Anda gavvâş-sıfat buldı güherler hâtem
22    Var ise necm-i hidâyetdür o fass-ı rûşen / K'olur anunla nice sâlike reh-ber hâtem
23    Burc-ı devletdür eli eylese peydâ ne 'aceb / Hey'et-i mâh-ı nev ü sûret-i ahter hâtem 
24    Dür-i sîr-âb ile gör gül-bün-i engüştinde / Jâle düşmiş gül-i nesrîne ne benzer hâtem
25    Ser-verâ mûmlayup ism-i şerîfün saklar / Kâ'inâtı ne 'aceb kılsa musahhar hâtem
26    Tavk-ı fermâne çeküp gerden-i teslîmlerin / Nice âzâdeleri eyledi çâker hâtem
27    Felek engüşteri-i kadrüne pîrûze nigin / Kapladı nâmun ile 'âlemi yek-ser hâtem
28    Görinür nakş-ı nigîninde sevâd-ı mührün / Devletün barmagına mâh-ı münevver hâtem
29    Yazdı hôş âyet-i Nûn ve'1-Kalem engüştünde / Ne midâd istedi ne hâme ne mıstar hâtem
30    Şeref-ı nâm-ı şerîfünden olursa hâlî / Bulımaz ragbet-i halhâl-i kebûter hâtem
31    Nâmun âfaka salar nefha-i 'ûd u 'anber / Meclis-i devletüne olalı micmer hâtem
32    Zâr u ser-geşte-i tâs-ı gam idüp düşmenünün / Pençe-i bahtın ider beste-i şeş-der hâtem
33    Dest-i kahrundan eger sille tokınsa görinür / Dîde-i düşmenüne halka-i ejder hâtem
34    Görür eltâfun ile maslahat-ı tîgı kalem / Bitürür kahrun ile hidmet-i hançer hâtem / 
35    Var ise irdi der-i lutfuna şey' lillâhe / K'eylemiş kâsesini pür-zer ü gevher hâtem
36    Feth-i bâb-ı keremi her ki kapundan bilmez / İhtiyâcı eline halka-i her der hâtem
37    Şol kadar irdi hedâyâ şeref-i medhünle / Ki benân-ı kalemüm oldı ser-â-ser hâtem
38    Tuhfe-i bezmün içün bu gazel-i rengîni / Levh-i zerrîne yazup eylesün ez-ber hâtem
39    Eyleyüp 'ayş-i hayâl-i leb-i dil-ber hâtem / Câm-ı zerrîn ile çeksün mey-i ahmer hâtem
40    Şekl-i hâl ü dehenün hâtem-i pîrûze nigîn / Dôstum görmedüm agzun gibi hôş-ter hâtem
41    Gerçi nâzüklik ile agzın arar engüştün / Dimez ammâ dehenün sırrını gizler hâtem
42    Ten-i sad-pâre ki şekl-i kafes-i zer-gerdür / Dâglar dilde olupdur ana yir yir hâtem
43    Hasret-i la 'l-i lebün bagrını pür-hûn itmiş / Dâg yakmaga korniş gögsine ahger hâtem
44    Anda zehr ola vü tiryâk leb-i dil-berde / Dehen-i yâre kaçan ola ber-â-ber hâtem
45    Dehen-i teng-i dil-âvîzüne benzer bulsa / Hâl-i müşgîn ile ger hatt-ı mu'anber hâtem
46    Düşse âyînesine pertev-i nûr-ı haddün / Vire hûrşîd-i cihân-tâb gibi fer hâtem
47    Sînemün dâgı ile cism-i dü-tâ-yı zerdüm / Kıldı engüşt-i belâda beni bir zer hâtem
48    Sararup mihnet ile benzi kızarmış çeşmi / Var ise baht-ı siyeh-kâruma aglar hâtem
49    La'l-i dil-dâr gibi ola mı handân yâkût / Dehen-i yâr gibi kanı suhan-ver hâtem
50    Bî- ' aded hâtem ile tapuna geldi Bâkî / Ki nice Rûm harâcını deger her hâtem
51    Koma ayakda bu masnû' u murassa' nazmı / Elde hoş yaraşur ey Âsaf-ı saf-der hâtem
52    Bulımaz dâ'iresin bu güher-i nâ-yâbun / İtmesün bir dahı bu devrde zer-ger hâtem
53    Hâtem-i nazma bu gün kimse bu hükmi viremez / Nice müfsidler ider gerçi müzevver hâtem
54    Bedel olmaz buna zirâ ki senün nâmunadur / Tutamaz mühr-i Süleymân yirin âher hâtem
55    Tâ bu eyvân-ı murassa' kemer-i 'âlîde / Taka engüşt-i hilâle meh-i enver hâtem
56    Mesned-i sadr-ı vezâretde ser-efrâz olasın / Kıla teslim şehenşâh-ı muzaffer hâtem
57    Mûmdur mülk-i cihân sana du'âm ol ki hemân / 'An-karîb eyleye Allâh müyesser hâtem