018 - Bahâriyye be-nâm-ı Destûr-ı a'zam 'Alî Paşâ

1    Rûh-bahş oldı Mesîhâ-sıfat enfâs-ı bahâr / Açdılar dîdelerin hvâb-ı 'ademden ezhâr
2    Taze cân buldı cihân irdi nebâtâta hayât / Ellerinde harekât eyleseler serv ü çenâr
3    Döşedi yine çemen nat'-ı zümürrüd-fâmın / Sîm-i hâm olmış iken ferş-i harîm-i gül-zâr
4    Yine ferrâş-ı sabâ sahn-ı ribât-ı çemene / Geldi bir kâfile kondurdı yüki cümle bahâr
5    Leşger-i ebr çemen mülkine akın saldı / Turma yagmada yine niteki yagı Tâtâr
6    Farkına bir nice per takınur altun tellü / Hayl-i ezhâra meger zanbak olupdur ser-dâr
7    Dikdi leşger-geh-i ezhâra sanavber tûgın / Haymeler kurdı yine sahn-ı çemende eşcâr
8    Döşedi mihr-i felek yollan dîbâlar ile / İtdi teşrîf çemen mülkini sultân-ı bahâr
9    Subh-dem velvele-i nevbet-i şâhî mi degül / Savt-ı mürgân-ı hôş-elhân u sadâ-yı kûh-sâr
10    Çemen etfâlinün uyhuların uçurdı yine / Subh-dem gulgule-i fâhte gül-bâng-i hezâr
11    Dâye-i ebr yine goncalarun şeb-nemden / Başına akçe dizer niteki etfâl-i sıgâr
12    Mevsim-i rezm degüldür dem-i bezm irdi diyü / Sûsenün hançerini tutdı ser-â-pâ jengâr
13    Semenün sîne-i sîmînin açup bâd-ı seher / Çözdi gül-şende gülün dügmelerin nâhun-ı hâr
14    Pîrehen berg-i semen gûy-ı girîbân şeb-nem / Gül-sitân oldı bu gün bir şanem-i lâle-'izâr
15    Zîb ü fer virmek içün rûy-ı 'arûs-ı çemene / Yâsemen şâne sabâ mâşıta âb âyine-dâr
16    Dür ü yâkût ile bir nahl-i murassa' sandum / Ergavân üzre dökilmiş katerât-ı emtâr
17    Şîşe-i çarhda gör bunca murassa' nahli / Nice ârâste kılmış yine sun'-ı Cebbâr
18    Berg-i ezhârı hevâ şöyle çıkardı felege / Pür-kevâkib görinür günbed-i çarh-ı devvâr
19    Dem-i 'Îsâ dirilür bûy-ı bahûr-ı Meryem / Açdı zanbak Yed-i Beyzâyı kef-i Mûsâ-vâr
20    Zanbakun goncasıdur bâga gümiş bâzû-bend / Za'ferân ile yazılmış ana hatt-ı tûmâr
21    Câm-ı zerrîni tolu bâde-i gül-reng itmiş / Gül-i ra'nâ seheri kılmag içün def'-i humâr
22    Dehen-i gonca-i ter dürlü letâ'if söyler / Gülüp açılsa 'aceb mi gül-i rengîn-ruhsâr
23    Güher-i fursatı aldurma sakın devr-i felek / Sîm ü zerle gözüni boyamasun nergis-vâr
24    Câm-ı mey katreleri sübha-i mercân olsun / Gelünüz zerk u riyadan idelüm istigfâr
25    Lâle sahrâyı bu gün kân-ı Bedahşân itdi / Jale gül-zâre nisâr eyledi dürr-i şeh-vâr
26    Dâmenin dürr ü cevâhirle pür itdi gül-i ter / Ki ide hâk-i der-i Hazret-i Pâşâya nisâr 
27    Sâhib-i tîg u kalem mâlik-i câm u hâtem / Âsâf-ı Cem-'azamet dâver-i Cemşîd-vekâr
28    Âsmân-pâye hümâ-sâye 'Alî Pâşâ kim / İremez tâk-i celâline kemend-i efkâr
29    Şâh-ı gül neşv ü nemâ bulsa nem-i lutfından / Ola her gonca-i ter bülbül-i şîrîn-güftâr
30    Âb u gil müşg ü gül-âb ola çemen sahnında / Bûy-ı hulkıyla güzâr itse nesîm-i eshâr
31    Tab'-ı vekkâdın eger âteş-i rahşân görse / Kızara ahker-i sûzân nitekim dâne-i nâr
32    Güneşi keff-i zer-efşânına benzer dir idüm / Almasa mâha 'atâ eyledügin âhır-ı kâr
33    Şöyledür keff-i güher-pâşı yemîn itmek olur / Ki 'atâsından irer bahre gınâ kâne yesâr
34    Manzar-ı kaşr-ı sa'âdetden anun re'yi gibi / Rûy göstermedi bir şâhid-i hurrem-dîdâr
35    Bâg-ı cûdında nihâl-i kereminden derilür / Lutf-ı bî-minnetinün mîvelerinden her bâr
36    Manzar-ı himmetinün küngüre-i rif'atine / İremez sarsar-ı tûfan-ı fenâ birle gubâr 
37    İşigi taşı imiş yüz sürecek hayf diyü / Taşdan taşa döger başını şimdi enhâr
38    Serverâ cânı mı var devletün eyyâmında / Sünbülün turrasına el uzada şâh-ı çenâr
39    Eylemez kimse bu gün kimse elinden nâle / Bezm-i 'işretde meger mutrıb elinden evtâr
40    Ser'a uymaz n'idelüm nâle vü zâr eyler ise / Gerçi kânuna uyar zemzeme-i mûsîkâr
41    Geşt iderken çemen-i medh ü senânı hatır / Lâyih oldı dile nâ-gâh bu şi'r-i hem-vâr
42    Gül gibi gül-şene kılsan n'ola 'arz-ı dîdâr / Hayli dökildi saçıldı yoluna fasl-ı bahâr
43    Reşk-i dendânun ile hançere düşdi jâle / Berg-i sûsende gören itdi sanur anı karâr
44    Geçemez çenber-i gîsû-yı girih-gîründen / Gerçi kim za'f ile bir kılca kalupdur dil-i zâr
45    Turralar milket-i Çîn nâfe-i müşgîn ol hâl / Gözün âhû-yı Huten gamzeleründür Tâtâr
46    Dil-i mecrûha şifâ-bahş ruh u la'lündür / Gül-be-şekkerle bulur kuvveti tab'-ı bîmâr
47    Degme bir gevheri kirpügine salındurmaz / Göreli la'1-i revân-bahşunı çeşm-i hûn-bâr
48    Koma Bâkî kulunı cür'a-sıfat ayakda / Dest-gîr ol ana ey dâver-i 'âlî-mikdâr
49    Bâg-ı medhünde olur cümleye gâlib tenhâ / Bahs içün gelse eger bülbül-i hôş-nagme hezâr
50    Puhtedür gayrılar eş'ârı velî puhte piyaz / Hâm 'anberdür eger hâm ise de bu eş'âr
51    Hâm var ise eger micmere-i nazmumda / Dâmen-i lutfun anı setr ider ey fahr-i kibâr
52    Bahr-i eş'âr yiter urdı sütûr emvâcın / Demidür k'ide du'â dürlerini zîb-i kenâr
53    Lâlelerle bezene niteki dest ü sahrâ / Nitekim güller ile zeyn ola dest ü destâr
54    Nitekim lâlelere şeb-nem olup üftâde / Güllere bülbül-i şeydâ geçine 'âşık-ı zâr
55    Gül gibi hurrem ü handân ola rûy-ı bahtun / Sâgar-ı 'ayşun ola lâle-sıfat cevher-dâr