017 - Kasîde-i Dîger [Gül meclisinde lâle yine kıldı âşikâr]

1    Gül meclisinde lâle yine kıldı âşikâr / Âyîn-i bezm-i 'işret-i Cemşîd-i kâm-kâr
2    Gül-zâre gel ki cümle cihândan nümûnedür / Sahn-ı çemende hâsıl olur seyr-i her diyâr
3    Döndi diyâr-ı Rûma semenlerle sahn-ı bâg / Gûyâ sevâd-ı mülk-i Habeşdür benefşe-zâr
4    Sahrâyı kıldı lâle Bedahşân vilâyeti / Gül-zârı itdi tâze çemen mülk-i sebze-zâr
5    Dôlâb kurdı kavs-i kuzah bâg-ı 'âleme     Mîz-âb gibi her yanadan akdı cûy-bâr
6    Çarh oklarını atdı yine gül-şene sehâb / Altun göbeklü bir siper-i la'l tutdı hâr
7    Gösterdi âb 'aks-i gül-i bâgı nitekim / Nusret yüzini âyîne-i tîg-i şehr-iyâr
8    Ol kim gubâr-ı der-gehine intisâb ile / Eflâke irdi küngüre-i tâc-ı iftihâr
9    Mülk-i sühanda nevbetümüz çaldı rûzgâr / Âfâkı tutdı velvele-i kûs-ı iştihar
10    Bâkî ne denlü sözlerün âb-ı revân ise / Akar su gibi yirde gerek rûy-ı i'tizâr
11    Kandan gedâ-yı bî-ser ü pâlar senün gibi / Kandan edâ-yı medh-i şehenşâh-ı tâc-dâr
12    Yüz sür Cenâb-ı Hakka niyâz u tazarru' it / Olsun mezid 'ömr-i Hudâvend-i rûzgâr
13    Kadr ü şerefde her gicesi Leyletü'l-berât / Eyyâm-ı 'ömr-i devleti nev-rûz u nev-bahâr