016 -  Der-medh-i Sultân Mehemmed Hân-ı Gâzî

1    Hüsnün ziyâsı pertev-i nûr-ı kıdem gibi / Rûşen cemâlün âyinesi subh-dem gibi
2    'Âlem harîm-i hürmet-i kûyunda muhterem / Vaslun harâm 'âşıka sayd-ı Harem gibi
3    Çeşmüm devât-ı surha dönüp hûn-ı eşk ile / Cismüm boyandı kana ser-â-pâ kalem gibi
4    Derdüm hisâba gelmedi kıldum muhâsebe / Göz yaşı dâne dâne dökildi rakam gibi
5    Sen sag ol ey visâli hayât-ı cihân olan / Ben bu firâka döymeyem âhır ölem gibi
6    Bâkî ne gam penâhun ola rûzgârda / Sultân Mehemmed ol şeh-i sâhib-kerem gibi
7    Meşhûr bezm-i devlet-i şâh-ı yegânede / Tab'un safa-yı meşreb ile Câm-ı Cem gibi
8    Ol şeh-süvâr-ı 'arsa-i ikbâl ü baht kim / Şâhân-ı dehr atı önince hadem gibi
9    Kadr-i bülend ü câh ile mümtâz u ser-firâz / Hayl-i mülûk-i 'âlem içinde 'âlem gibi
10    Hakdan niyâzum ol ki 'adûsı zamânede / Râhat yirini bulmaya kûy-ı 'adem gibi
11    Âsîb-i rüzgâr-ı hazândan emin ola / Gül-zâr-ı 'ömr-i devleti bâg-ı İrem gibi
12    Pâ-mâl-i esb-i devleti küffâr-i hâk-sâr / Hâkân-ı Çîn mutî' ola şâh-ı 'Acem gibi
13    Kesr-i 'adü vü feth-i memâlik 'ale'd-devâm / Gürz-i girânı kelle-i düşmende zam gibi