015 - Bahâriyye be-nâm-ı Sultân Mehemmed Hân-ı Gâzî

1    Cihân bâgına virdi revnak-ı fırdevs-i a'lâyı / Temâşâ eyle sun'-ı Hazret-i Bârî Te'âlâyı
2    Uyandur çeşm-i cânı hvâb-ı râhatdan seher-hîz ol / Çemen bülbülleriyle subh-dem zikr eyle Mevlâyı
3    Cihâna zîb ü fer virdi yine meşşâta-i kudret / 'Arûs-ı nev gibi ârâyiş itdi kühne dünyâyı
4    Zamâne hâl-i Hindû-yı benefşe zînetin görsün / Nisâr itsün Sitânbûla Semerkand ü Buhârâyı
5    İrişdi hâkden bûy-ı bahûr-ı Meryem eflâke / Mu'attar eyledi göklerde dâmân-ı Mesîhâyı
6    Gülün pîrâhen-i Yûsuf gibi dâmânı çâk olmış / Nesîm-i perde-der kıldı meger mekr-i Zelîhâyı
7    Ne mümkin dest-res dâmân-ı vasl-ı yâre ey Bâkî / Felek nâ-mihribân düşmen kâvî dil-dâr her-câyî
8    Talup gavvâş-ı dil kaldı derûn-ı bahr-i hayretde / Sanur arayı arayı bulam ol dürr-i yek-tâyı
9    Sözin lü'lû-yı lâlâdan zamâne tutdı zî-kıymet / Neden şâh-ı cihân bî-kıymet eyler böyle lâlâyı
10    Mehemmed Hân-ı Gâzî âl-i 'Osmânun ser-efrâzı / Cihânun kâr-sâzı ol sezâ-yı kâr-fermâyî
11    Ziyâ-bahş olsun âfâka cemâl-i 'âlem-efrûzı / Fürûzân eyledükçe tal'at-i nev-rûz dünyâyı