014 - Tehniye-i kudûm-i Sultân Mehemmed Hân Gâzî ez sefer-i huceste-eser

1    Bi-hamdi'llâh refîk oldı yine tevfîk-i Rabbânî / Muzaffer kıldı sultân-ı cevân-baht-ı cihân-bânı
2    Kudûm-ı şâh ile halkun bu gün başına gün togdı / Yine tâb-ı rikâbından cihanı kıldı nûrânî
3    Eşi'' a bâl ü per oldı güneş zeyn itdi etrâfın / İrem tâvûsı gibi subh-dem gösterdi cevlânı
4    Yine ol sancak-ı zerrîn-ser ü sîmîn-kabâ kıldı / Livâ-yı subh-ı nûrânî gibi rûşen bu eyvânı 
5    Cihân emn ü emân buldı yine şemşîr-i pûlâdın / Belâ Ye'cûcına sedd eyledi İskender-i sânî
6    Yıkıldı hânümân-ı bahtı ber-bâd oldı a'dânun / Revân oldı nesîm-i feth ile taht-ı Süleymânî
7    Bisât-ı emni bast itdi basît-i arza ikbâli / Ne denlü kılsa ta'zîmi felek ol şâha erzânî
8    Dür ü gevher nisâr itsün yolına ebr-i bârânî / Ser-â-ser atlas u dîbâ döşetsün mihr-i rahşânî
9    Güneşdür tal'atı gûyâ cihândan def'u ref' itdi / Zalâm-i zulm u 'udvânı dalâl-i küfr ü tugyânı
10    Şeh-i kişver-sitân Sultân Mehemmed Hân-ı Gâzî kim / 'Adûnun 'ırkını kat' eyledi şemşîr-i bürrânı
11    Süleymân gibi haşr oldı livâsı zıllına 'âlem / Ziyâde leşger-i mûr u melahdan âdem oglanı
12    'Adûyı dil-figâr itdi peleng-âsâ şikâr itdi / Muhassal âşikâr itdi neberd-i Şîr-i Yezdânı
13    Didi Behrâm-ı düşmen-kâm gördi darb-ı şemşîrin / Koluna kuvvet ey rûz-ı vegânun Şâh-ı Merdânı
14    Süreyyâ sanman üstinde görince şîr-i gerdûnı / Atıldı âsmâne kûh-sâr-ı kahrı kaplanı
15    Elinden ol kadar düşmen yimişdür boz doganı kim / Kızılelmadan eyvâ kopdı nâ-geh işidüp anı
16    Çalındı kûslar tabl u nekâre saldı âvâze / Dügün bayram idi gûyâ guzâta ceng meydânı
17    Kimi şemşîr-bâz oldı kimi cân-bâz bu halkun / Temâşâ eylesen ol günde görsen hâl-i insânı
18    Ser-encâm-ı cadû âhır ne hâle irişür dirken / Hezârân kelleler tôp itdi nâ-geh çarh çevgânı
19    Dil-âverler oyunlar oynadı küffâre ol gün kim / Gören bâzîçe-i takdirün oldı deng ü hayrânı
20    Çıkup yelkenlüler Rûmi siperden bâd-bânlarla / Yine gösterdiler cûş u hurûş-ı bahr-i 'ummânı
21    Neheng-âsâ dil-âverler 'adûyı yutdılar gitdi / 'Aceb deryâ imiş hakkâ bu leşger-gâh-ı 'Osmânî
22    Ser-i bî-magz-ı düşmenden fezâda kâseler toldı / Sibâ'-ı kûh u deşte kıldılar tertîb-i mihmânî
23    Meger kim ugramış gerdûn öninde seyl-i hûn içre / Şafak sandı şebân-geh halk dâmânındaki kanı
24    Dem-i a'dâ ile deşt-i cihânı lâle-zâr itdi / Sipâh-ı berk-reftâr-ı Tatârun tîr-bârânı
25    Hudâvendâ sen ol İskender-i pâkîze-meşrebsin / Akıtdı tab'-ı pâkûn ayagına Âb-ı hayvânı
26    Ne cünbiş kıldı kim âhır dil-i düşmende yir itdi / Meger gösterdi ol nîze hırâm-ı kadd-i hûbânı
27    Misâl-i halka-i zülf-i girih-gîr-i ham-ender-ham / Biri birine koydı tîg-i kahrun kâfir-istânı
28    Licâmunda sitâm olmak yaraşur çarhun ecrâmı / Semendün sîne-bendinde gül-i zer mâh-ı tâbânı
29    Bilürsin anı mürg-i beyza-i pûlâd-ı nusretdür / 'Aceb mi dâne divşürse elinde tîg-i bürrânı
30    Hemân âyîne-i sırr-ı Hudâdur tab'-ı şâhâne / Müberrâ gıll u gışdan kalbi sâf u sâde sultânî
31    Mücellâ sînesi âyîne-dâr-ı şâhid-i gaybî / Musaffâ hâtırı sûret-pezîr-i râz-ı pinhânî
32    Hemân oldur niyâzum senden ey Keyhusrev-i sânî / Ki gûş-ı hûşa mengûş eyle dürr-i pend-i pîrânı
33    Sikendersin karînûn feylesôfân-ı cihân olsun / Hakımân-ı zamâne hîçe saymaz şahs-ı nâ-dânı
34    Niyaz it Hakka ey Bâkî vücûdın hıfz ide Bârî / Hatâlardan nigeh-dâr olsun ol Dârâ-yı devrânı
35    Hudâvendâ Hudâ ol zât-ı pâke hırz-ı cân olsun / Du'â-yı müstecâb-ı tâ'ifân-ı 'arş-ı Rahmânî
36    Belâ gird-âbına salsun 'adûnı nâ-bedîd itsün / Fenâ deryâsına gark eyleyen Fir'avn u Hâmânı
37    Hemîşe feth-i fîrûzı livânâ iltivâ itsün / Kapuna iltica kılsun cihânun hân u hâkânı