013 - 'Arz-ı hâl be-südde-i bî-misâl-i Sultân Mehemmed Hân

1    Cân virürdüm cevher-i cân istese cânân eger / Bezl iderdüm yolına zî-kıymet olsa cân eger
2    'İd ü gül hem-sohbet oldı câm-ı zer sundı hilâl / Göklere çıksa yiridür na're-i mestân eger
3    Aldanurdum gül-bün-i 'ömrün yüze güldügine / 'Ahdine tursa zamâne dönmese devrân eger
4    Hvâr u zâr olmazdı bülbül hâre yâr olmazdı gül / 'Aksine devr itmeyeydi günbed-i gerdân eger
5    Aglamazdum zahm-ı hârından bu fânî gül-şenün / Bir güle baksa hele ol gonca-i handân eger
6    Cû' u zillet derdidür etfâli giryân eyleyen / Aglamazdı tıfl-ı dil olsa elinde nân eger
7    Harc kim bî-dahl ola mevcûd olan nâ-bûd olur / Olsa mâlün fı'1-mesel mahsûl-i bahr u kân eger
8    Lâ-cerem bir gün zemîn-i huşk olur deryâ-yı Nîl / Menba'ından yagmasa bir nice dem bârân eger
9    Derd ü mihnet çekme der-gâhında ey Bâkî yüri / 'Arz kıl bilmezse hâlün hazret-i Sultân eger
10    Ol ki hûrşîd-i cihân-tâba zekât-ı zer virür / Kâse-gerdân olsa şehrinde meh-i tâbân eger
11    Feyz-i envâr-ı kef-i zer-bahşı besdür 'âleme / Akmaz olsa çeşme-i hûrşîd-i nûr-efşân eger
12    Kasr-ı kadrün âsmân eyler olursa dest-gîr / Himmet-i vâlâ-yı şâhenşâh-ı 'âlî-şân eger
13    Biz gedâ mihmâniyüz lâyık görürse hükm anun / İşiginde nâne muhtâc oldugın mihmân eger
14    Gelmeye bir dahı misli dehre bin sa'y itseler / Heft ahter nüh felek yanınca çâr erkân eger
15    Nûh 'ömrin virsün Allâhum hatâdan saklasun / Yıksa bünyâd-ı sarây-ı 'âlemi tûfân eger