023 - Kasîde-i Dîger be-nâm-ı Hvâce-i Sultân Selîm

1    Hûrşîd öninde şu'lelenür mâh-ı nev müdâm / Gûyâ ki şem'a karşu görinür kenâr-ı câm
2    Câm-ı hilâli hep bilece gördiler bu şeb / Halk-ı cihâna kıldı Hudâ rûzeyi harâm
3    Kibritini degürdi şafak nârına hilâl / Tâ kim çerâg-ı mâhı yakup ref' ola zalâm
4    Mûy-ı sefîdi halkasını çarh-ı pîre-zen / İsterdi dahı eyleye halk-ı cihâna dâm
5    Çarh-ı 'acûze baglanup altunlu çenberin / Bir nev-'arûs gibi ider nâz ile hırâm
6    Yâ nâhunı görindi felek bir pelengdür / K'olmışdur ana kulle-i kûh-ı cefâ makâm
7    Yâ defter-i sipihrde re'y-i resîddür / Deyn-i sıyâmı halk edâ itdiler tamâm
8    Zerrîn devât mâh-ı nev altun kalem şihâb / Erkâmdur nücûm u felek defter-i sıyâm
9    Behrâm eline hançer alup kaşd ider ya hod / A'dâ-yı dîn ü düşmen-i İslâma intikâm
10    Cirm-i kamer hilâl ile 'ayn-ı 'Alî yazar / 'İd-i şerîfe irmek içün kadr ü ihtiram
11    Nârencdür sarardı güneşden yanı disem / Olurdı bu mülâhaza hem bir hayâl-i hâm
12    İllâ ki mâh-ı 'îda bu sözler ba'îddür / Erbâb-ı 'akl öninde hakîkat budur kelâm / 
13    Peyk-i zamâne zer teberin dûşına alup / İrgürdi Hvâce hidmetine 'iddan peyâm
14    Ol fâzıl-ı zamâne lebîb-i habîb-i halk / Ol 'ârif-i yegâne edîb-i bülend-nâm
15    Mihr-i sipihr-i mekremet ol kim cenâbına / Gökden hilâl iki bükilüp virür selâm
16    Devrân içinde ana bu gün mâh-ı nev gibi / Kimdür ki kaddin itmeye vakt-i selâm lâm
17    Münkâd emr ü nehyine eshâb-ı i'tibâr / Ednâ işaretine zevi'l-ihtirâm râm
18    Envâr-ı mihri birle münevver cebîn-i subh / Enfâs-ı hulkı birle mu'attar meşâm-ı şâm
19    Şemşîr-i ihtimâmına nisbet kelîl ü künd / Ger tîg-i Kahramân ola ya hod hüsâm-ı Sâm
20    Bâzû-yı sa'yı gerden-i maksûda salmadın / Şemşîr-i 'azmi olmadı hem-hvâbe-i niyâm
21    Fazlı fezâsı içre bu eflâk bî-karâr / Evc-i hevâda yidi mu'allak döner hamâm
22    Bircîs işigi hâkine olurdı çihre-sây / Olmasa ger cibâh-ı efâzıldan izdihâm
23    Deryâ-yı 'ilme dür gibi gavvâs olanlara / Virdi zamâne hidmeti silkinde intizâm
24    Keff-i yem-i yemîni nem-i cûdın itse feyz / Bârân yirine dürr ü güher yagdurur gamâm
25    Gün gibi başı göklere irdi şu kimsenün / Kim zerre denlü eyledi şânında ihtimâm
26    Âyînedür ki sûret-i ikbâli gösterür / Sahn-ı sarây-ı devleti ferşinde her ruhâm
27    Dehre devâm-ı devletidür gâyetü'1-münâ / Çarha bekâ-yı 'izzetidür müntehe'l-merâm
28    Ey Hvâce-i yegâne senün âsitânuna / Bâkî kemîne bende geçer kemterîn gulâm
29    Hâk-i derün sücûdın ider bir fütâdedür / Lutf eyle dest-gîri ol itsün biraz kıyâm
30    Ser-rişte-i murâdı n'ola elde bulsa ol / Habl-i metîn-i 'ahdüne kılmışdur i'tişâm
31    Gerdûn-ı dûna eylemez ol 'arz-ı ihtiyâç / Tapun tururken eyleye mi minnet-i li'âm
32    Hâtem bu devr içinde geleydi cihâna ger / İtmek dilerdi süfre-i cûdundan igtinâm
33    Lutfun zülâlin eyle 'atâ teşne-dillere / Ey menba'-ı mekârim ü ser-çeşme-i kirâm
34    Hatm oldı söz du'â-yı cemîlün mahallidür / K'ola rahîk-i câm-ı senâ 'anberîn hıtâm
35    Dürr-i du'ânı zeyn idelüm tâ ki yaraşa / Sâk-ı mesâk-ı midhata halhâl-i ihtişam
36    Hem-vâre tâ ki edhem-i zerrîn-sitâm-ı çarh / Na'1-i zer ile eyleye bu 'arsada hırâm
37    Devrân mutî' u gerdiş-i gerdûn be-kâm-ı dil / Ecrâm râm devlet ü ikbâl müstedâm