024 - Kasîde-i Bâkî berây-ı Mehemmed Çelebi

1    Urınup farkına bir tâc-ı mücevher sünbül / Oldı iklîm-i çemen tahtına ser-ver sünbül
2    Şeh-levendâne şikest eyledi tarf-ı külehin / Gögsinün dügmelerin çözdi ser-â-ser sünbül
3    Oldı gül-şen yine bir dil-ber-i müşgîn mergül / Şol kadar virdi ana zînet ü zîver sünbül
4    Çihre gül sîne semen çeşm-i mükehhal nergis / Hat çemen gonca dehen ca'd-ı mu'anber sünbül
5    Yazdurup müşg ile boynına hamâ'il takdı / Kendüye itmek içün halkı musahhar sünbül
6    Sahn-ı gül-zâra gelüp eyledi arz-ı dîdâr / Jâlelerden takınup gûşına gevher sünbül
7    Benzer ol bûy-ı dil-âvîz ile mûy-ı yâre / Başlar üzre n'ola ger eyler ise yir sünbül
8    Yine gömgök tere batmış çıka geldi çemene / Nev-bahâr irdi diyü virdi haberler sünbül
9    Beden-i pâki neden böyle olurdı hôş-bû / Olmasa müşg ü gül-âb ile muhammer sünbül
10    Var ise bencileyin 'âşık-ı zâr olmışdur / Gök gök itmiş döginüp cismini yir yir sünbül
11    'Aşk sevdâlarına ugramasa kalmaz idi / Mûy-ı jülîde ile bir ten-i lâgar sünbül
12    Yine Fir'avn-ı şitâ ceyşine Mûsâ-mânend / Eyledi elde 'asâsını bir ejder sünbül
13    Nev-'arûs-ı çemene mâşıtadur fasl-ı bahâr / Kim anun hâme-i müşgînine benzer sünbül
14    Sâkıyâ zevrakı sür bâd-ı bahâr esdi yine / Sebze-zâr oldı yem-i ahdar u lenger sünbül
15    Sahn-ı gül-şende yatupdur gice var ise meger / Ki takınmış seherî başına güller sünbül
16    Bürüdi kendinün etrâfını bâl ü per ile / Yine tâvûs-sıfat cilveler eyler sünbül
17    Yine ferrâş-sıfat destine cârûb almış / Ki ide hidmet-i hâk-i der-i dâver sünbül
18    Fâzıl-ı dehr Mehemmed Çelebi kim eflâk / Bâg-ı fazlında tokuz dânelü bir ter sünbül
19    Olamaz reh-güzeri hâkine hem-pâ 'anber / İdemez turrasına kendüyi hem-ser sünbül
20    Geldi bir Hindû-yı bî-çâre-sıfat işigüne / Garazı bu ki kapunda ola çâker sünbül
21    Bâg-ı lutfunda meh ü mihr iki ahkar nergis / Keremün gül-şenine sünbüle kem-ter sünbül
22    Bûy-ı hulkunla güzâr eylemese bâga nesim / İdemez halk dimâgını mu'attar sünbül
23    Bulsa bârân-ı sehân ile eger neşv ü nemâ / Kad-i bâlâ çeke mânend-i sanavber sünbül
24    Ebr-i cûdundan eger irse nem-i in'âmun / Bitüre hâre gül ü lâle vü mermer sünbül
25    Ger tokınsa nefes-i lutf u dem-i ihsânun / Gidere dûd-ı kebûdı vire âzer sünbül
26    Nûr'-bahş olsa eger bâga çerâg-ı lutfun / Şem'-vâr eyleye etrâfı münevver sünbül
27    Cür'a-rîz olsa eger gül-şene câm-ı keremün / Tuta nergis-sıfat elde kadeh-i zer sünbül
28    Hâline 'ayn-ı 'inâyetle nigâh eyler isen / Göz açup ide nazar niteki 'abher sünbül
29    Bezmüne gelmek ile bu ne kerâmetdür kim / Dimeye sayf u şitâ bitüre micmer sünbül
30    Dâne hatjâle nukat nefha-i müşgîn ma'nâ / Yazdı levh-i çemene bir gazel-i ter sünbül
31    Gam-ı gîsün ile âşüfte degül ger sünbül / Ne içün böyle perîşân olur ekser sünbül
32    Var ise turralarun bâg-ı cinân sünbülidür / Kopmadı bagdan ol resme mu'anber sünbül
33    Goncanun cânı mı var öyküne la'l-i lebüne / Zülfüne kaç başı var ola ber-â-ber sünbül
34    Bâde-i la'lüne hemşîre şarâb-ı gül-fâm / Zülf-i müşgîn-i semen-sâna birâder sünbül
35    Hûb olur 'ârızun üstinde o hatt-ı müşgîn / Âb-ı nâb içre turur tâze vü hôş-ter sünbül
36    Lâle reşk-i ruh-ı gül-gûnun ile pâ-der-gil / Gam-ı zülfünle perîşân u mükedder sünbül
37    Nice teşbîh idem agzuna bir ebkem gonca / Nice nisbet kılam ol zülfe ber-â-ber sünbül
38    Dûdlar çıkdı yanup reşk-i ruhun nârına bâg / Câ-be-câ sanma çemende görinenler sünbül
39    Ruhlarun üzre yatur zülf-i semen-sâ gûyâ / Gül-i terden idinür kendüye bister sünbül
40    Hat-ı müşgîn-i leb-i la'lüne mânend olmaz / Bulsa ger perveriş-i çeşme-i Kevser sünbül
41    Yaraşur zülf ü ruhun vasfına defter yazsam / Kâgıdı berg-i gül ola hat-ı defter sünbül
42    Levh-i hâtırda hatun nakşını tasvîr itdüm / Olmadın safha-i gül-zâra musavver sünbül
43    Nazm-ı eşhâsa kıyâs eyleme Bâkî şi'rin / Ola mı her giyeh-i huşke ber-â-ber sünbül
44    Gerçi sünbül çog olur gül-şen-i 'âlemdür bu / Lîk rengîn ü mutarrâ olamaz her sünbül
45    N'ola kadr ü şerefün sâl-be-sâl olsa mezîd / Her yıl arturmadadur dâneyi dirler sünbül
46    Götürüp tâ ki şehenşâh-ı bahârun tûgın / Getüre cünd-i şitâ üstine leşger sünbül
47    Ser-i a'dâna taka seng-i melâmet güller / Ola düşmenlerünün başına şeş-per sünbül