025 - Kasîde-i Bahâriyye be-nâm-ı Kâdî-zâde

1    Perde-i şâm olıcak mihre nikâb-ı ruhsâr / Zâhir oldı gözüme hey'et-i ebrû-yı nigâr
2    Âfitâb üzre meger hâme-i dest-i kudret / Çekdi bir med nitekim hâcib-i rûy-ı dil-dâr
3    Kamerün altına yâ safha-i eflâk üzre / Râ yazupdur kalem-i sun'-ı Celîl ü Cebbâr
4    Bir güneş yüzlü firâkında felek hasret ile / Var ise hançere düşdi nitekim 'âşık-ı zâr
5    Mevsim-i 'ayş u tarabdur şeb-i 'îd irdi diyü / Mutrıb-ı çarh eline aldı meger mûsîkâr
6    Gûyiyâ hâzır olur irte salât-ı 'îda / Dâl tacın başına geydi sipihr-i gaddâr 
7    Keh-rübâ sübhasın aldı ele çarh-ı sâlûs / Halka cevr eylemeden ya'nî ider istigfâr
8    Dehr bir şâh-ı sipend urdı felek micmerine / Meh-i nev sanma şafakda görinen zerd ü nizâr
9    Mâhı sayd itmek içün bahre şalup kullâbın / Meh-i nev tutdı meger sâhil-i deryâda karâr
10    Kara yaklaşdı şeb irdi diyü keştî-i hilâl / Bâd-bân açmış ider sür'at ile 'azm-i kenâr 
11    Çizmege dâ'ire-i şemse-i mâhı felege / Aldı üstâd-ı zamân destine zerrin pergâr
12    Mâh-ı nev dâm kurup dökdi kevâkib erzen / Umaruz k'ola yine 'ayş u safâ mürgi şikâr
13    Kodı bir pâre yahı tâs-ı zer-endûda felek / Sıvara tâ Ramazân teşnelerin sakkâ-vâr
14    Eseridür görinen urdı mihekk-i şâma / Satıcak sayrafî-i dehre felek bir dinâr
15    Bâmdan düşdi dilâ taşt-ı meh-i nev bu gice / Güft ü gûy ile pür olsa n'ola şehr ü bâzâr
16    Urdı çevgân-ı zeri gûy-ı zümürrüd-gûna / Meh-i 'îd oldı yine tevsen-i gerdûna süvâr
17    Kamerî yakalu bir hûb ser-â-ser geydi / Ola tâ bezm-i hudâvende felek hidmet-kâr
18    Vâriş-i 'ilm-i Nebî Hazret-i Kâdî-zâde / Efzal-i ehl-i zamân eşref-i eşrâf u kibâr
19    Füşehâ vü bülegâ bezmine mîr-i meclis / 'Ulemâ vü fuzalâ zümresine şâh-süvâr
20    Bû 'Alî-hikmet ü Hâtem-kef ü Nu'mân-mezheb / Mustafâ-hulk u Mesîhâ-dem ü Yûsuf-dîdâr
21    Mâh-ı nev mîl-i zer almış ele kehhâl-sıfat / İşiginden çeke tâ dîde-i gerdûna gubâr
22    Eline girmek içün fazla-i hvân-ı keremi / Meh-i nev destin açar niteki şahs-ı cerrâr
23    Sîne-i âyine-sîmâsına benzerdi eger / Safha-i mâh-ı şeb-efrûzda olmasa gubâr
24    Ne 'aceb fazlına nâ-dân eger inkâr itse / İtdi mi Ahmed-i Muhtâra Ebû Cehl ikrâr
25    Güneşün zerre kadar kadrine noksân gelmez / Eylese nûr-ı cihân-tâbını huffâş inkâr
26    Ne şeref câh ile ger olsa zamânen sâbık / Gül-i ter sonra gelür gül-şene evvel has u hâr
27    Sadr-ı 'âlîye geçürse n'ola nâ-dânı felek / Dâ'imâ nakısı a'lâya çıkarur mi'yâr
28    Bir olur mıydı bu gün kıymet-i ehl ü nâ-ehl / Nâkıd-ı çarh eger eylese teşhîs-i 'ayâr
29    Ezelî böyledür âyîn-i sipihr-i gaddâr / Ki gülün hvâb-gehi hâr ola hârun gül-zâr
30    Ser-verâ mihver-i gerdûn-ı fezâ'il kalemün / Merkez-i himmetün eflâk-ı me'âlîye medâr
31    Ravza-i 'ilm-i tarâvetde nem-i hâmen ile / Tâzeler gül-şen ü bâgı nitekim ebr-i bahâr
32    Noktalar kim dökilür hâme-i müşgînünden / Her biri şâhid-i ma'nâya olur hâl-i 'izâr
33    Bir güherdür söz ana tab'-ı şerîfündür kân / 'İlm bir bahr-durur sen ana dürr-i şeh-vâr
34    Kâdî-i mahkeme-i 'âlem-i bâlâ Bircîs / Müşkilin müftî-i re'yünden ider istifsâr
35    Bu kadar nûrı güneş kandan iderdi tahsîl / Olmasa re'y-i cemîlün yüzine âyine-dâr
36    Bu fezâ'il ki sana Bâri Te'âlâ virmiş / İtmeyüpdür dahı bir nâkil-i ahbâr ihbâr
37    Kelimâtum yirine dürr ü güher nazm itsem / İdemez mertebe-i fazlunı eş'âr iş'âr
38    Rif'atum kasrı sala sath-ı semâya sâye / Eger olursa ana bâni-i lutfun mi'mâr
39    İrdi söz gâyete Bâkî ne dimek lâzımdur / Hâl ma'lûm hod ey Hvâce-i 'âlî-mikdâr
40    Nitekim her ser-i mâh ola bir altun kandîl / Zîver-i dâ'ire-i çenber-i çarh-ı devvâr
41    Mâh-ı nev gibi terakkîde dem-â-dem kadrün / Çeşm-i encüm gibi bahtun gözi dâ'im bî-dâr