026 - Der-medâyih-i Kâdî-i Şâm Müftî-zâde-i sâhib-ihtişâm

1    Bâga reşk itse revâ ravza-i firdevs-i berîn / Şol kadar zînet ü fer virdi yine Ferverdîn
2    İrişür bâd-ı seherden nefehât-ı cennât / Mevsim-i Ürdibihişt irdi bihişt oldı zemîn
3    Demidür lâle yaka bezm-i bahâra meş'al / Gonca-i zanbak ola nergise şem'-i bâlîn
4    Görinür sahn-ı çemenden yine şâh-ı nergis / Âsmândan nitekim hey'et-i 'ıkd-ı Pervîn
5    Bâgun evrâk-ı bahar u katerât-ı şeb-nem / Dâmenin eyledi pür-sim ü zer ü dürr-i şemîn
6    Nergis-i bâga nazar kıl ne dimekdür bu kim / Câm-ı zerrîn ile 'ayş eyleye bir hâk-nişîn
7    Sâhil-i bahr-i 'Adendür meger etrâf-ı çemen / Dest-i mihr anun içün oldı bu gün gevher-çîn
8    Gonca-veş bâg-ı belâda nice bir hâsıl ola / Girih-i hâtır u teşvîş-i dil ü çîn-i cebîn
9    Bâga 'azm eyle yüri turma ki sahn-ı gül-şen / Cân-fezâdur niteki meclis-i mahdüm-ı güzîn
10    Hâsıl-ı 'ömr-i girân-mâye-i Şeyhü'l-islâm / Pertev-i lutf-ı Hudâ nûr-ı hüdâ revnak-ı dîn
11    Menba'-ı mekremet ü lutf Mehemmed Çelebi / Vâhib-i fazl u 'atâ sâhib-i 'izz ü temkîn
12    Bâg-ı kadrinde anun sahn-ı sipihr ü encüm / Bir çemendür ki dökilmiş ana berg-i nesrîn
13    Kef-i kân hâsiyetinden görüp ihsân nic'olur / Yirlere geçdi hayâdan utanup genc-i defîn
14    Def'-i Ye'cûc-ı gama işigidür sedd-i sedîd / Men'-i ceyş-i eleme der-gehidür hışn-ı hasîn
15    Nisbet olınsa eger fazlına zannum bu kim / Menzil-i vehmdedür mu'tekad-ı ehl-i yakîn
16    Defter-i devletine mihver-i eflâk kalem / Hâtem-i kadrine bu günbed-i firûze nigîn
17    Kabza-i kudretine kavs kemân-ı Rüstem / Nâvek-i re'yine per şeh-per-i Cibrîl-i emîn
18    Meclis-i 'işretine bâde şafak bâdiye çarh / Nukl encüm meh ü hûrşîd iki câm-ı zerrîn
19    Gonca-veş tab' pes-i perde-i 'uzletde seher / Sakin olmışdı ser-efgende vü dil-teng ü gamîn
20    Mülhim-i gayb gönül âyinesin karşu tutup / Eyledi tûti-i câna bu kelâmı telkîn
21    Ruhuna benzer idi âyine olsa rengîn / Öykünürdi lebüne la'l olaydı şîrîn
22    Secde kıldı göricek mâh kaşun mihrâbın / Bilmeyen şöyle hayâl eyledi kim ola cebîn
23    Kime kîn itdi yine çîni var ebrûlarunun / Olmış ol çeşm-i gazâlânelerün âhû-yı Çîn
24    Dil-i âşüfte-sıfat cevr ile pâ-mâl itme / Hindû-yı halka-be-gûşundur o zülf-i miskîn
25    Hûn-ı dil sanma görinenleri müjgânumda / Dîde gül-zâr-ı 'izârundan olupdur gül-çîn
26    Ebr-i nîsân gibi bu kilk-i güher-bârına / Eyledi gûş-ı cihânı sadef-i dürr-i semîn
27    Gerden-i dehre yine silk-i cevâhir takdum / Riştedür ma'ni-i bârîk ü güher lafz-ı güzîn
28    Ser-verâ şi'r degül nutk-ı Mesîhâdur bu / Tutalum gayriler eş'ârı ola sihr-i mübîn
29    Ne 'aceb ger ola bu nazm-ı revân rûh-efzâ / Ki senün midhat-i cân-perverüne oldı karîn
30    Hâsıl ey kân-ı kerem irdi bu gün ol dem kim / Eser-i 'âtıfet ü lutf zuhûr ide hemîn
31    Lâyık-ı devlet ü şâyeste-i ikbâl oldur / Kalmaya Bâkî-i bî-çâre melûl ü gamgîn
32    Söz tamâm oldı niyaz eyleyelüm der-gâha / İşidüp diye feleklerde melekler âmîn
33    Nitekim mâşıta-i dehr 'arûs-ı çemenün / Çihresin eyleye ârâyiş-i zib ü tezyîn
34    Lutf tab 'ehline ola nitekim hâlet-bahş / Çihre-i dil-ber ü şi'r-i ter ü âvâz-ı hazîn
35    Hûr-sîmâlar ile şöyle pür olsun haremün / Görüp îmâna gele anı sanem-hâne-i Çîn
36    Şöyle eş'âr-ı güher-bâr okına aduna kim / Cân u dilden ide Hassân ana yüz bin tahsîn
37    'Andelîbân-ı hoş-elhân-ı gül-istân-ı senâ / İdeler medhün ile hoş nagamât-ı rengîn