027 - Der-vasf-ı sarây-ı Ferîdûn Beg

1    Te'âla'llâh zehî tâk-ı bülend-i âsmân-âsâ / Hezâr ahsent ey burc-ı felek-kadr u semâ-sîmâ
2    'Aceb beyt-i musanna'dur bulınmaz degme dîvânda / Ferah-bahş u safâ-güster neşât-engîz ü rûh-efzâ
3    İki mısrâ' iki yanında hôş mevzûn u dil-keşdür / Der-i devlet-sarây-ı dil-güşâ bir matla'-ı garrâ
4    Harim-i hâşa yol virmez açılmaz şahs-ı nâ-dâna / Nigâr-ı pâk-dâmendür münakkaş perdesi gûyâ
5    Murassa' câmlarla bir 'aceb şâhâne meclisdür / Düşinde görmedi Cem böyle 'işret-hâne-i zîbâ
6    Görüp ol câm-ı gül-rengi seherden eyler âhengi / Sanur güllerle zeyn olmış kafesdür bülbül-i şeydâ
7    Nedür ol gûşe-i bâmındaki âvîzeler dirsen / O zîbâ turraya bir şânedür kim itdiler peydâ
8    Dem-â-dem sîm ü zer micmer kılur ol turraya hem-ser / Duhân-ı 'ûd u 'anberden kemend-i zülf-i müşg-âsâ
9    Libâs-ı hüsn ile bir şûh-ı sîm-endâma dönmişdür / Der ü divân zeyn olmış ser-â-ser atlas u dîbâ
10    Letâfetde ruhâmı sîm-i hâmı itdi bî-ragbet Mücellâ mermeri mevcin görenler sandılar hârâ
11    İrem bagı ana nisbet degül bir taşına kıymet / Egerçi kıymeti taş iledür bünyâdı ser-tâ-pâ
12    Zülâlinden 'ibâretdür nesîminden kinâyetdür / Safâ-yı çeşme-i Kevser hevâ-yı Cennetü'l-me'vâ
13    Nice matbû' u mevzûn olmaz ol kasr-ı mu'allâ kim / Ana mi'mâr ola tedbir-i sâhib-re'y-i mülk-ârâ
14    Cihân-ı himmetün bahr-i fırâvânı Ferîdûn Beg / Ki üstine habâb olmış anun ol kubbe-i 'ulyâ
15    Sütûr-ı nâmesinden mülk ü millet sebzesi hurrem / Sütûn-ı hâmesinden dîn ü devlet haymesi ber-pâ
16    Sadef gûşın müzeyyen kılmag içün dürr-i lafzından / Kelâmın istimâ' eyler pes-i dîvârdan deryâ
17    Dühûl-i meclis-i hâsına ruhsat mümkin olmazsa / Buhârîden gelür dinler hadîsin tâlib-i ma'nâ
18    Hezârân mürdeye bir demde lutfun tâze cân virdi / Mesîhâ resm ü âyînin muhassal eyledün ihyâ
19    Cihânda bir kurı adı kalupdur çeşme-i Hızrun / Sen eylersin bu gün Âb-ı hayât ahkâmını icrâ
20    Kef-i cûdun vücûd iklîmine bir tarh-ı nev saldı / 'İmâret buldı lutfunla sarây-ı kühne-i dünyâ
21    Sipihrün nitekim câm-ı zümürrüd-fâmı devr eyler / Olur 'işret-sarây-ı halk tâ nüh günbed-i hadrâ
22    Cihânda sâgar-ı devlet murâdun üzre devr itsün / Gönül hôşlıkların kılsun müyesser Hazret-i Mevlâ
23    Nigeh-dârun Hudâvend-i zemîn ü âsmân olsun / Cihân turdukça âbâd olsun ol tâk-ı felek-fersâ