1 Var iken kûyun ki seyr-i bâg-ı 'ukbâ bundadur / Cennet evsâfın kılur vâ'iz temâşâ bundadur
2 Hûr u Kevserden mey ü mahbûb ise maksûd eger / 'Ayş u nûş esbâbı hep hâzır müheyyâ bundadur
3 Mürdeye cânlar virür bîmâra sıhhat lebleri / Hikmet-i Lokmân u i'câz-ı Mesîhâ bundadur
4 Zülfün el bir eyleyüp turranla pinhân itdiler / Hâtem-i dil hâsılı ya andadur ya bundadur
5 'Akıbet kim ser-fürû kılmaz gedâ vü şâhdan / Bâr-gâh-ı 'aşka kim a'lâ vü ednâ bundadur
6 Hây u hûy-ı hânkâh u na're-i mestâneden / Hep visâlün küncidür maksûd gavgâ bundadur
7 İctinâb it sohbet-i ehl-i riyâdan Bâkıyâ / Kim rızâ-yı Hazret-i Bârî Te'âlâ bundadur
157 - Var iken kûyun ki seyr-i bâg-ı 'ukbâ bundadur
- Ayrıntılar
- Üst Kategori: Bâkî
- Kategori: Gazeller
- Görüntüleme: 107
- Vezin: Fâ'ilâtün Fâ'ilâtün Fâ'ilâtün Fâ'ilün