1 Meclisünde şol ki dâ'im sâkıyâ sâgar çeker / Hayl-i gam tâlânına her cür'ası leşger çeker
2 Mâ'î câmen üzre şemşîrün takınsan nâz ile / San melekler âsmâne ey kamer ejder çeker
3 Gül-şen-i bâg-ı mahabbetde diker tâze nihâl / Her elif kim sîneme ol kameti 'ar'ar çeker
4 Kâtib-i gam nâme-i a'mâl-i 'aşkum yazmaga / Tîg-i dil-ber şerhalardan sîneme mıstar çeker
5 Çarh bir sarrâfdur mihr ile meh mîzân ana / Çâr-sû-yı dehr içinde gice gündüz zer çeker
6 Gül-sitân-ı tende oldı çeşm-i pür-hûn bâg-bân / Hâk-i pâye tuhfe ey gonca gül-i ahmer çeker
7 Bâkıyâ gökde şihâb atılmadı Mirrîh-i çarh / Rûy-ı yâre öykünür diyü mehe hançer çeker
183 - Meclisünde şol ki dâ'im sâkıyâ sâgar çeker
- Ayrıntılar
- Üst Kategori: Bâkî
- Kategori: Gazeller
- Görüntüleme: 126
- Vezin: Fâ'ilâtün Fâ'ilâtün Fâ'ilâtün Fâ'ilün