264 - Şikâyet cevr-i dil-berden dil-i şeydâyı söyletsen

1    Şikâyet cevr-i dil-berden dil-i şeydâyı söyletsen / Günâh andan yine ol şûh-ı bî-pervâyı söyletsen
2    Firâk-ı câm-ı la'lünle ne çekdi sâgar-ı gamdan / Ne kanlar yutdı görsen gonca-i ra'nâyı söyletsen
3    Leb-i la'lünle mey bahsinde gavgâ hadden aşmışdur / İşitsen kîl ü kâli şîşe-i sahbâyı söyletsen
4    Hadîs-i 'aşkı harf u lafz ile kılmaz edâ ammâ / Ne ra'nâ söyler ol ma'nâyı çeng ü nâyı söyletsen
5    Nebât-ı hatt u kand-i la'l-i nâbun düşmez agzından / Biraz gûş eylesen tûtî-i şekker-hâyı söyletsen
6    Ne dillerden ne dürler dökdügin deryâ-sıfat görsen / Hurûş u cûş ile bir gün dil-i dânâyı söyletsen
7    Kelâm-ı 'aşk ey Bâkî ser-â-ser sırr-ı vahdetdür / Murâdı cümlenün birdür bütün dünyâyı söyletsen