286 - Yalunuz bülbül degül mest-i şarâb-ı câm-ı gül

1    Yalunuz bülbül degül mest-i şarâb-ı câm-ı gül / Başumuzda hâlet-i câm-ı sürûr-encâm-ı gül
2    Sâkıyâ sür câm-ı gül-rengi degül vakt-i direng / Gâyet-i evvel bahâr u âhır-ı eyyâm-ı gül
3    Buldı zînet lü'lu-yı şeh-vâr-ı şeb-nemden yine / Tâc-ı la'l-i gonca vü taht-ı zümürrüd-fâm-ı gül
4    Savt-ı mürg u na're-i mestâne tutdı 'âlemi / Hasılı hengâmeden hâlî degül hengâm-ı gül
5    Zikr-i hüsn ü vasf-ı ruhsârunla herkes âşinâ / Yâda gelmez ruhlarun devrinde ammâ nâm-ı gül
6    Bezme gelse bir dem eglenmez gider ol gonca-leb / Az olur gül-şende gâyet müddet-i ârâm-ı gül
7    Sâgar-ı gül-gûn-ı 'işret vâye-i Kâvûs-ı hâr / Hançer-i hâr-ı melâmet behre-i Behrâm-ı gül
8    Bâkıyâ devrân sitem-ger çarh bî-rahm olmasa / Pister-i hâr üzre n'eyler nâzenin endâm-ı gül