289 - Gül-zâra gel nesîm-i sabâ gibi hōş-dem ol

1    Gül-zâra gel nesîm-i sabâ gibi hōş-dem ol / Açıl derûn-ı gonca gibi şâd u hurrem ol
2    Sahn-ı harîm-i vaslına düşmek murâd ise / Evvel safâ-yı tab' ile mânend-i şeb-nem ol
3    Kesb-i letâfet eyle nesîm-i seher gibi / Andan derûn-ı perde-i esrâra mahrem ol
4    Akar su gibi irmege bir bahr-i kâmile / Seyr it basît-i hâkde seyyâh-ı 'âlem ol
5    Başun gerekse göklere irsün güneş gibi / Dervişlik dilersen eger zerreden kem ol
6    Hâk-i harîm-i hürmet-i kûyın makâm idin / Erkân-ı Ka'be gibi mu'azzez mükerrem ol
7    Bâkî hısâl-i merdüm-i nâkıs-vücûdı ko / İnsân-ı kâmil olmaga sa'y eyle âdem ol