292 - Gitdi hecr irdi dem-i vasl u telâkî berü gel

1    Gitdi hecr irdi dem-i vasl u telâkî berü gel / Olalum bezm-i mahabbetde mülâkî berü gel
2    Sâkıyâ sâgarı sun hecr humârın yazalum / Nâmeden hakk idelüm nâm-ı firâkı berü gel
3    Zevk u şevkun yiridür raks uralum dest-efşân / Virelüm zelzeleye tâk u revâkı berü gel
4    Sunma la'1-i şeker-efşânunı bî-zevklere / Eyle şîrîn dehen-i ehl-i mezâkı berü gel
5    Hıtta-i Rûmdadur 'ırk-ı nihâl-i ikbâl / Özleme hâk-i Horâsân u 'Irâkı berü gel
6    Çok tehî devr ide bu sâgar-ı mînâ bizden / Var iken şîşede bâkî hele sâkî berü gel
7    Umaruz himmet-i merdân-ı tarîkat yitişe / Nâ-gehân bir gün efendüm diye Bâkî berü gel