1 Ayaklarda kalur sünbül o zülf-i nîm-tâb-âsâ / Saçunla bahs iderse başa çıkmaz müşg-i nâb-âsâ
2 Hevân içre ezel bir sadme urdı sarsar-ı âhum / Döner dôlâb-ı çarh ol dem bu demdür âsiyâb-âsâ
3 Derûnun pür-ma'ârif hem-nişînün merd-i 'ârif kıl / Açılma ey yüzi gül şahs-ı nâ-dâna kitâb-âsâ
4 Kemânçe şekline girdüm elinde mutrib-i 'aşkun / Keş-â-keşden halâs olmaz dahı sînem rebâb-âsâ
5 Zer-efşân ol kef-i ihsân ile seyr eyle 'âlemde / Cihân-gerd ü cevân-merd-i cihân ol âfitâb-âsâ
6 Yüzüm üzre kadem basmaz cefâ vü cevrden geçmez / Yolında kıldugumdan n'oldı ben cismüm türâb-âsâ
7 Tutarken câmı nâşî gelse tâc ü günbed altında / Mey-i gül-rengi pinhân eyle ey sofî habâb-âsâ
8 Hasûdun dürd-i derdin çekme ey Bâkî bu bezm içre / Nedimün yâr-ı hoş-meşreb gerek câm-ı şarâb-âsâ
002 - Ayaklarda kalur sünbül o zülf-i nîm-tâb-âsâ
- Ayrıntılar
- Üst Kategori: Bâkî
- Kategori: Gazeller
- Görüntüleme: 97
- Vezin: Mefâ'îlün Mefâ'îlün Mefâ'îlün Mefâ'îlün