1 Yüzün şems-i duhâ rûz-ı visâlün 'Îd-i Edhâdur / Cemâlünden müzeyyen her taraf 'âlem temâşâdur
2 Haremden na're-i Lebbeyke Lebbeyk irdi eflâke / Ser-i kûyunda gûyâ nâle-i 'uşşâk-ı şeydâdur
3 Gönül hâk-i harîm-i âsitânun ârzû eyler / Derûn-ı dilde niyyet âb-ı Zemzemden musaffâdur
4 Cenâb-ı Hazrete yüz tut kim oldur kıble-i 'ârif / Sücûdundan garaz zîrâ rızâ-yı Rabb-i a'lâdur
5 İrişsün Ka'be-i kûy-ı rızâna tek dil-i Bâkî / Harîm-i hürmetün kurbında kurbân ile irzâdur
6 Murâdun Hân Murâdun himmetinden kıl recâ ey dil / Kim ol sultân-ı sûret pâdişâh-ı mülk-i ma'nâdur
065 - Yüzün şems-i duhâ rûz-ı visâlün 'Îd-i Edhâdur
- Ayrıntılar
- Üst Kategori: Bâkî
- Kategori: Gazeller
- Görüntüleme: 81
- Vezin: Mefâ'îlün Mefâ'îlün Mefâ'îlün Mefâ'îlün