093 - Sohbetün mübtelâya sıhhat olur

1    Sohbetün mübtelâya sıhhat olur / Bir selâmun alan selâmet olur
2    Câm-ı derdünle dil huzûr eyler / Râh-ı vaslunla rûh râhat olur
3    Kâmetün cilvesin dirîg itme / Pâdişehler bülend-himmet olur
4    Komadı dilde gıll u gış mey-i nâb / Ne güzel hâsıyetlü şerbet olur
5    Câm-ı mey sadr-ı mey-gede kimine / Tâc-ı devlet serîr-i 'izzet olur
6    Mey-i la'l âdeme ziyân itmez / Belki ser-mâye-i sa'âdet olur
7    Gâh rind-i gedâya feyz irişür / Câm-ı mey meş'al-i hidâyet olur
8    Tâ'at u ma'siyet ne kim kılsam / Şöyle sanman ki bî-irâdet olur
9    Dôstdan yek işâret ey Bâkî / Câna sad mûcib-i beşâret olur