099 - Dil merg-zâr-ı mihr ü vefâ mürg-i zârıdur

1    Dil merg-zâr-ı mihr ü vefâ mürg-i zârıdur / Dîdâr-ı yâr hüsn ü bahâ nev-bahârıdur
2    Bir âbdur ki akdugı yir lâle-zâr olur / Tîgun ki gül-sitân-ı safâ cûy-bârıdur
3    Zülfün duhân-ı meş'ale-i bezm-i hüsndür / Agzun çerâg-ı lutf u melâhat şirârıdur
4    'Uşşâkı zîr-i hâke iletse n'ola gamun / Derd-i mahabbet ehl-i dilün yâr-ı gârıdur
5    Câm-ı zer ile buldı ziyâ bezm-i devleti / Nergis ki taht-gâh-ı çemen tâc-dârıdur
6    Çeşm ü çerâg-ı merdüm-i sâhib-nazar yiter / Câm-ı şarâb-ı nâb ki Cem yâd-igârıdur
7    Bâkî hümâ-yı evc-i sa'âdet zamânede / Şâhîn bakışlu Şâh Selîmün şikârıdur