154 - Ebrûlarun gamını dil-i nâ-tevân çeker

1    Ebrûlarun gamını dil-i nâ-tevân çeker / Şol pehlevâna döndi ki iki kemân çeker 
2    Çeksün livâ-yı saltanat-ı hüsni kadd-i yâr / Ol kameti ne serv ü sanavber ne bân çeker
3    Gelmez vücûda nakd-i visâlün tasavvûrı /  'Aşkun metâ'ı hvâceleri çok ziyân çeker
4    Hakkâ bu kim berât-ı hümâyûn-ı hüsnine / Ebrû-yı dil-firîbi ne garrâ nişân çeker
5    Sürdükçe nîzelerle yanundan müjen dili / Kullâblarla turra-i 'anber-feşân çeker
6    Bâr-ı girân-ı gussayı çekmez şu kimse kim / Sahn-ı çemende gül gibi rıtl-ı girân çeker
7    Bâkî gamunda hûn-ı ciger yutsa gûyiyâ / Bezm-i safâda câm-ı mey-i ergavân çeker