155 - İderken tîr-i müjgânun gibi hükmin revân hançer

1    İderken tîr-i müjgânun gibi hükmin revân hançer / Görüp şemşîr-i gamzen kendüden geçdi hemân hançer
2    'Adunun tîg-ı kâfir gibi lerzân itdi endâmın / Miyânına takındı husrev-i sâhib-kırân hançer
3    Çemende berg-i sûsen gökde mâh-ı nev degül peydâ / Çeker a'dâ-yı dîn üzre zemîn ü âsmân hançer
4    Şehâ bir dem ney-i hâmen cihân bezminde dinlensün / İçürsün düşmene câm-ı fenâyı bir zamân hançer
5    'Adûnun kılsun endâmın ser-â-pâ kana müstagrık / Bitürsün bâg-ı nusretde nihâl-i ergavân hançer
6    Nisâr itdi gazâ yolına der-gâh-ı şehenşâha / Murassa' bir kemer gerdûn meh-i nev zer-nişân hançer
7    Tazarru' demleri geldi Cenâb-ı Hakka ey Bâkî / İdüp Feth âyetin ezber dilin kılsun revân hançer