171 - Âlâyiş-i dünyâdan el çekmege niyyet var

1    Âlâyiş-i dünyâdan el çekmege niyyet var / Yakında 'adem dirler bir şehre 'azîmet var
2    Uçdı bu fezâlardan mürg-i dil-i nâlânum / Ârâm idemez oldum efkâr-ı seyâhat var
3    Nûş eylese bir 'âşık tâ haşre dek ayılmaz / Bezm-i felekün bilmem câmında ne hâlet var
4    Bu hâlet ile ey dil sag olmada 'âlemde / Derd ü gam-ı dil-ber ile ölmekde letâfet var
5    Gitdükçe harâb eyler mülk-i dil-i vîrânı / Dehrün bu cefâsından bir şâha şikâyet var
6    Ser terkine kâ'ildür dünyâya gönül virmez / Terk ehlinün ey Bâkî başında sa'âdet var