214 - Sîne-i 'âşıkda sırr-ı la'l-i cânân gizlemiş

1    Sîne-i 'âşıkda sırr-ı la'l-i cânân gizlemiş / Kân-ı ebdân içre ol kim cevher-i cân gizlemiş
2    Dilde şol 'âşık ki sırr-ı 'aşkun itmişdür nihân / Gûşe-i vîrânede genc-i firâvân gizlemiş
3    Dilde mihr-i hâtem-i la'lün nihân itmiş rakîb / Dîv işitdük bir zamân mühr-i Süleymân gizlemiş
4    Sîne çok seyr itdük ey dil var ise ol sîm-ber / Sihr ile koynında kurs-ı mâh-ı tâbân gizlemiş
5    Bir sadefdür dürr-i evsâfunla dîvânum benüm / 'ârif almış koynına mânend-i 'ummân gizlemiş
6    Hattınun pîrûzesin buldı çıkardı bâd-ı subh / Zîr-i dâmânında ol zülf-i perişân gizlemiş
7    Bin hicâb-ı kibriyâ ardında göstermez yüzin / Kendüyi gözlerden ol sultân-ı hûbân gizlemiş
8    Hep mezâhir üzre zâhir çeşm-i nâzırdan nihân / Kendü envârında kendin mihr-i rahşân gizlemiş
9    Nükte-i lâl-i revân-bahş ile ey Bâkî yine / Zulmet-âbâd-ı midâdun âb-ı hayvân gizlemiş