1 Yazdı nakkâş-ı kazâ levh-i bahâr-istâne nakş / Bagladı nev-rûzda bülbül bir üstâdâne nakş
2 Bulmaya ol hadd-i gül-gûn üzre hattun hâletin / Müşg-i terden yazsalar berg-i gül-i handâne nakş
3 Âb-ı rûyundan irer âyîne-i hûrşîde tâb / Tâb-ı zülfünden düşer levh-i zamîr-i kâne nakş
4 İşigün hûn-âbe-i eşkümle reng-âmîz idi / Yazmadın nakkâş-ı kudret bu bülend eyvâne nakş
5 Peyker-i zerd ü nizârum var iken 'âkil midür / Hey'et-i Mecnûn yazan sûret-ger-i dîvâne nakş
6 Rûy-ı zerd ü eşk-i hûnînünle ey Bâkî yüri / Yaza gör hâk-i cenâb-ı Hazret-i Sultâne nakş
7 Şeh Selîm ol kim gubâr-ı na'l-i şeb-rengi yazar / Safha-i ruhsâre-i hûrşîd-i nûr-efşâne nakş
213 - Yazdı nakkâş-ı kazâ levh-i bahâr-istâne nakş
- Ayrıntılar
- Üst Kategori: Bâkî
- Kategori: Gazeller
- Görüntüleme: 122
- Vezin: Fâ'ilâtün Fâ'ilâtün Fâ'ilâtün Fâ'ilün