1 Mahabbet husrev-i fermân-dih-i şâh u gedâ ancak / Musahhar cümle 'âlem 'aşka bir sırr-ı Hudâ ancak
2 Şikâyet cevr-i dil-berden kadîmi resmdür ammâ / Hakîkatde cefâ ehl-i vefâya bir safâ ancak
3 Nazarda merhametden yok eser ey şûh-ı sengîn-dil / Kıya bakışlarundan anlanur kalbün kaya ancak
4 Gözüme özge 'âlemler temâşâ itdürür sînen / Nice sîne bu hod âyîne-i 'âlem-nümâ ancak
5 Kazâ-yı âsmânîden sakınmak sûd-mend olmaz / Rızâdur çâresi 'aşkun görinmez bir belâ ancak
6 Cihân rûşen ziyâsından mahabbet ol Hudâ hakkı / Çerâg-efrûz-ı 'âlem nûr-ı pâk-i Mustafâ ancak
7 Zarûrî ser-fürû kıldı edâna düşmen ey Bâkî / Senün şemşîr-i tab'un Zül-fekâr-ı Murtazâ ancak
234 - Mahabbet husrev-i fermân-dih-i şâh u gedâ ancak
- Ayrıntılar
- Üst Kategori: Bâkî
- Kategori: Gazeller
- Görüntüleme: 111
- Vezin: Mefâ'îlün Mefâ'îlün Mefâ'îlün Mefâ'îlün