271 - Şarâb-ı dil-güşâ olmaz o la'l-i cân-fezâdan yig

1    Şarâb-ı dil-güşâ olmaz o la'l-i cân-fezâdan yig / Müferrih hab bulınmaz hâl-i rûy-ı dil-rübâdan yig
2    Musaffâ la'li ol şûhun safâda Câm-ı Cemden hōş / Mücellâ sînesi âyîne-i 'âlem-nümâdan yig
3    Mahabbet lezzetin idrâk iden mihnetden incinmez / Gelür derdün dil-i bîmâr-ı 'uşşâka devâdan yig
4    Seni cândan seven bî-dillerün lutf eyle kadrin bil / Bulınmaz bende-i mukbîl muhibb-i bî-riyâdan yig
5    Güşâyiş gerd-i râhundan yitişdi dîde-i câna / Safâ-yı hâk-i der-gâhun cilâ-yı tûtiyâdan yig
6    Bülend-âvâze kıl sâz u nevâ-yı 'aşkı ey mutrıb / Ki kalmaz kubbe-i gerdûnda hergiz ol sadâdan yig
7    Umûrun Hakka tevfîz it tevekkül eyle ey Bakî / Ki cây-ı ilticâ olmaz cenâb-ı Kibriyâdan yig