-I-
1 Ey pây-bend-i dâm-geh-i kayd-ı nâm u neng / Tâ key hevâ-yı meşgale-i dehr-i bî-direng
2 An ol güni ki âhir olup nev-bahâr-ı 'ömr / Berg-i hazâne dönse gerek rûy-ı lâle-reng
3 Âhir mekânun olsa gerek cür'a gibi hâk / Devrân elinden irse gerek câm-ı 'ayşa seng
4 İnsân odur ki âyine-veş kalbi sâf ola / Sînende n'eyler âdem isen kîne-i peleng
5 'İbret gözinde niceye dek gaflet uyhusı / Yitmez mi sana vâkı'a-i Şâh-ı şîr-ceng
6 Ol şeh-süvâr-ı mülk-i sa'âdet ki rahşına / Cevlân deminde 'arsa-i âlem gelürdi teng
7 Baş egdi âb-ı tîgına küffâr-ı Üngürûs / Şemşîri gevherini pesend eyledi Freng
8 Yüz yire kodı lutf ile gül-berg-i ter gibi / Sandûka saldı hâzin-i devrân güher gibi
- II -
1 Hakkâ ki zîb ü zînet-i ikbâl ü câh idi / Şâh-ı Sikender-efser ü Dârâ-sipâh idi
2 Gerdûn ayagı tozına eylerdi ser-fürû / Dünyâya hâk-i bâr-gehi secde-gâh idi
3 Kem-ter gedâyı az 'atâsı kılurdı bay / Bir lutfı çok mürüvveti çok pâdişâh idi
4 Hâk-i cenâb-ı hazreti der-gâh-ı devleti / Fazl u belâgat ehline ümmîd-gâh idi
5 Hükm-i kazâya virdi rızâyı egerçi kim / Şâh-ı kazâ-tevân u kader-dest-gâh idi
6 Gerdûn-ı dûna zâr u zebûn oldı sanmanuz / Maksûdı terk-i câh ile kurb-i İlâh idi
7 Cân u cihânı gözlerimüz görmese n'ola / Rûşen cemâli 'âleme hûrşîd ü mâh idi
8 Hûrşîde baksa gözleri halkun tola gelür / Zîrâ görince hâtıra ol meh-likâ gelür
- III -
1 Döksün sehâb kaddin anup katre katre kan / İtsün nihâl-i nârveni nahl-i ergavân
2 Bu acılarla çeşm-i nücûm olsun eşk-bâr / Âfâkı tutsun âteş-i dilden çıkan duhân
3 Kılsun kebûd câmelerin âsmân siyâh / Geysün libâs-ı mâtem-i Şâhı bütün cihân
4 Yaksun derûn-ı sîne-i ins ü perîde dâg / Nâr-ı firâk-ı Şâh Süleymân-ı kâm-rân
5 Kıldı firâz-ı küngüre-i 'arşı cilve-gâh / Lâyık degüldi şânına hakkâ bu hâk-dân
6 Mürg-i revânı göklere irdi hümâ gibi / Kaldı hazîz-i hâkde bir iki üstühân
7 Çâpük-süvâr-ı 'arsa-i kevn ü mekân idi / İkbâl ü 'izzet olmış idi yâr ü hem-'inân
8 Ser-keşlik itdi tevsen-i baht-ı sitîze-kâr / Düşdi zemîne sâye-i eltâf-ı Kirdigâr
- IV-
1 Olsun gamunda bencileyin zâr u bî-karâr / Âfâkı gezsün aglayurak ebr-i nev-bahâr
2 Tutsun cihânı nâle-i mürgân subh-dem / Güller yolınsun âh u figân eylesün hezâr
3 Sünbüllerini mâtem idüp çözsün aglasun / Dâmâne döksün eşk-i firâvânı kûh-sâr
4 Andukça bûy-ı hulkunı derdünle lâle-veş / Olsun derûn-ı nâfe-i müşg-i Tatâr târ
5 Gül hasretünle yollara tutsun kulağını / Nergis gibi kıyâmete dek çeksün intizâr
6 Deryâlar itse 'âlemi çeşm-i güher-feşân / Gelmez vücûda sencileyin dürr-i şâh-vâr
7 Ey dil bu demde sensin olan bana hem-nefes / Gel nây gibi inleyelüm bârî zâr zâr
8 Âheng-i âh u nâleleri idelüm bülend / Eshâb-ı derdi cûşa getürsün bu heft bend
-V-
1 Gün togdı Şâh-ı 'âlem uyanmaz mı hvâbdan / Kılmaz mı cilve hayme-i gerdûn-cenâbdan
2 Yollarda kaldı gözlerümüz gelmedi haber / Hâk-i cenâb-ı südde-i devlet-me'âbdan
3 Reng-i 'izârı gitdi yatur kendü huşk-leb / Şol gül gibi ki ayru düşüpdür gül-âbdan
4 Gâhî hicâb-ı ebre girür husrevâ felek / Yâd eyledükçe lutfunı terler hicâbdan
5 Tıfl-ı sirişki yirlere girsün du'âm odur / Her kim gamundan aglamaya şeyh u şâbdan
6 Yansun yakılsun âteş-i hecrünle âfitâb / Derdünle kara çullara girsün sehâbdan
7 Yâd eylesün hünerlerüni kanlar aglasun / Tîgun boyınca karaya batsun kırâbdan
8 Derd ü gamunla çâk-i girîbân idüp kalem / Pîrâhenini pârelesün gussadan 'alem
- VI -
1 Tîgun içürdi düşmene zahm-ı zebânları / Bahs itmez oldı kimse kesildi lisânları
2 Gördi nihâl-i serv-i ser-efrâz-ı nîzeni / Ser-keşlik adın anmadı bir dahı bânları
3 Her kanda bassa pây-ı semendün nisâr içün / Hânlar yolunda cümle revân itdi cânları
4 Deşt-i fenâda mürg-i hevâ turmayup konar / Tîgun Hudâ yolında sebîl itdi kanları
5 Şemşîr gibi rûy-ı zemîne taraf taraf / Saldun demür kuşaklu cihân pehlevânları
6 Aldun hezâr büt-gedeyi mescid eyledün / Nâkûs yirlerinde okutdun ezânları
7 Âhır çalındı kûs-ı rahîl itdün irtihâl / Evvel konagun oldı cinân bûstânları
8 Minnet Hudâya iki cihânda kılup sa'îd / Nâm-ı şerîfün eyledi hem gâzî hem şehîd
- VII -
1 Bâkî cemâl-i Pâdişeh-i dil-pezîri gör / Mir'ât-i sun'-ı Hazret-i Hayy-i Kadîri gör
2 Pîr-i 'Azîz-i Mısr-ı vücûd itdi intikâl / Mîr-i cevân-ı çâpük-i Yûsuf-nazîri gör
3 Gün togdı şimdi gâyete irdi sepîde-dem / Ruhsâr-ı hûb-ı husrev-i rûşen-zamîri gör
4 Behrâm-ı vakti gûra yitürdi bu sayd-gâh / Var işigine hidmet-i Şâh Erdşîri gör
5 Ber-bâd kıldı taht-ı Süleymânı rûzgâr / Sultân Selîm Hân-ı Sikender-serîri gör
6 Vardı peleng-i kûh-ı vegâ hvâb-ı râhate / Küh-sâr-ı kibriyâda turan nerre şîri gör
7 Cevlâne gitdi ravzaya tâvûs-ı bâg-ı kuds / Ferr-i hümây-ı evc-i sa'âdet-mesîri gör
8 İkbâl ü baht-ı husrev-i âfâk müstedâm / Rûh-ı revân-ı Şâha Tahiyyât ve's-selâm
- VIII -
1 Kıldukça Şâh-ı 'âleme Hak fazl u rahmeti / Virsün cihânda Hazret-i Pâşâya devleti
2 Sâhib-kırân-ı 'arsa-i iklîm-i saltanat / Ol dem ki kıldı mülk-i bekâya 'azîmeti
3 Ol cism-i pâki cânı gibi eyledi nihân / Âsûde kıldı hâl-i sipâh u ra'iyyeti
4 Halk-ı cihâna kırk sekiz gün tuyurmayup / Bir hafta kıldı gayrılar ancak bu hâleti
5 Tedbîri gör ki irmedi kimse hayâline / Âsaf cihâna gelse göreydi vezâreti
6 Gayret kemerlerini kuşandı kılıç gibi / Aldı Hisârı virdi Hudâ feth ü nusreti
7 Râhat yüzini görmedi çalışdı cân ile / Çekdi Efendi yolına bu denlü zahmeti
8 Yâ Rab kemâl-i lutfuna kaldı senün hemân / Pâşâ kulun cihânda tamâm itdi hidmeti
9 Âsîb-i dehr ü âfet-i devr-i zamâneden / Hıfz u himâyet eyle o sâhib-sa'âdeti
10 Dâ'im çerâg-ı devlet ü bahtın münevver it / İki cihânda gönli murâdın müyesser it
001 - Mersiye-i Sultân Süleymân Hân 'aleyhi'r-rahmeti ve'l-gufrân
- Ayrıntılar
- Üst Kategori: Bâkî
- Kategori: Musammatlar
- Görüntüleme: 166
- Vezin: Mef'ûlü Fâ'ilâtü Mefâ'îlü Fâ'ilün