002 - Mersiye-i Mihrümâh Sultân

-I-
1    Cây-ı âsâyiş olur sanma cihân-ı fânî / Eyleme kasd-ı 'imâret bu harâb eyvânı
2    Menzil-i bâr-ı belâ kühne-serâdur dünyâ / Künc-i râhat yiri zann eyleme bu vîrânı
3    Felegün kasr-ı dil-âvîzine meftûn olma / Nice mîrâsa girüpdür bu sarây-ı fânî
4    Düşmen-i ehl-i keremdür felek-i sifle-nevâz / Görünüz n'itdi o Şeh-zâde-i 'âlî-şânı
5    Âb u tâbın giderüp teff-i semûm-ı kahrı / Berg-i nîlûfere döndürdi gül-i handânı
6    Kanı ol küngüre-i tâc-ı sa'âdet güheri / Kanı ol bâr-geh-i lutf u kerem sultânı
7    Kanı ol dürr-i dil-efrûz-ı sehâ deryâsı / Kanı ol gevher-i nâ-yâb-ı mürüvvet kânı
8    Mihr ü mâh-ı felek-i baht u sa'âdet Sultân / Şem'-i eyvân-ı serâ-perde-i 'ismet Sultân
-II-
1    Ebr-i bârân ki yagar bâg u gül-istân üzre / Katreler kim dökilür sünbül ü reyhân üzre
2    Cûylar kim tolanur dâmen-i sahrâlarda / Jâleler kim görinür lâle-i Nu'mân üzre
3    Hep o göz yaşlarıdur akdı bisât-ı arza / Aglaşur ehl-i semâ Hazret-i Sultân üzre
4    Mâtemin tutsa n'ola 'âlem-i 'ulvîde melek / Sâye-i rahmet-i Rahmân idi insân üzre
5    Bu fenâ gül-şeninün hâr u hasından göçürüp / Kurdılar bâr-gehin ravza-i Rıdvân üzre
6    Cism-i pâkin götürüp hâkden aldı Rıdvân / Döşedi hvâb-gehin gurfe-i gufrân üzre
7    Ser-be-ser salmış idi sâye-i fazl u ihsân / Şeh-per-i 'atıfeti hayl-i yetîmân üzre
8    Aglan ey hayl-i yetîmân u garîban aglan / Yâd idüp ni'met-i Sultânı firâvân aglan
- III -
1    'Îd yaklaşdı döşensün yine kasr u dîvân / Çıkup eyvân-ı sa'âdetde buyursun Sultân
2    Der-i der-gâhına 'azm eylesün eşrâf-ı diyâr / İşigi hâkine yüzler süre gelsün a'yân
3    Hala Sultân diyü şeh-zâdeler ikbâl itsün / Gelsün ol lutf u kerem kânına şâd u handân
4    Âh kim hvâb u hayâl oldı bu devletler hep / Turmadı 'aksine devr eyledi çarh-ı gerdân
5    Gelüp ahbâb serîninde seni görmeyicek / Kanı Sultân diyü eflâke irişsün efgân
6    Ne hatâ eyledün ey tîr-i kec-endâz-ı felek / Merdüm-i dîde-i devrâna tokındı peykân
7    Kimse ummazdı bu târîhe degin çak bu kadar / Bî-vefâlık yüzini göstere mir'ât-ı zamân
8    Meded Allâh meded 'avn ü 'inâyet senden / Bu firâk âteşine döymege tâkat senden
-IV-
1    Bir yire cem' olalum hâtırı mahzûnlar ile / Zâr zâr aglaşalum dîde-i pür-hûnlar ile
2    Gülmenün oynamanun 'âlemi gitdi şimdi / Hâlümüz söyleşelüm hâli diger-gûnlar ile
3    Şöyle bî-hûş u harâb eyledi efsâne-i gam / 'Aklumuz başumuza gelmeye efsûnlar ile
4    Nakd-i vakt oldı bize eşk-i sefîd ü ruh-ı zerd / Derd ü gam tâlibiyüz akçeler altunlar ile
5    Ni'met-i rahmet-i Rahmâna yitişdi o velî / Biz ciger hûnı yirüz bunda ciger-hûnlar ile
6    Kondı sahn-ı çemene ravza-i firdevs içre / Sâye-bânlar kurılup çetr-i hümâyûnlar ile
7    Kapusında işigi hidmetin eyler gılmân / Hûriler karşu turur atlas u eksûnlar ile
8    Minnet Allâha kemâl-i kerem-i Rabbânî / Eyledi iki cihân devletini erzânî
-V-
1    Lâyık-ı magrifet-i Hazret-i Gaffâr olsun / Devlet-i nâ-mütenâhîye sezâ-vâr olsun
2    Hıl'at-i fâhiresi dâmen-i 'afv-i Settâr / Rûh-ı pâkine gıdâ lezzet-i didâr olsun
3    Merkad-i pâkin idüp şem'-i hidâyet rûşen / Meşhed-i tâhiri müstagrık-ı envâr olsun
4    Âkıbet yoklık imiş kâr-ı cihan ey Bâkî / N'idelüm Şâh-ı cevân-baht-ı cihân var olsun
5    Dahı ol duhter-i sa'd-ahter-i pâkize-güher / Çeşm-i Nâhîd gibi rûşen ü bîdâr olsun
6    Âb-ı rûy-ı vüzerâ Hazret-i Ahmed Pâşâ / Mazhar-ı lutf-ı Hudâvend-i cihân-dâr olsun
7    Ak gül goncaları gibi güzel körpelerin / Hâr-ı âzârdan Allah nigeh-dâr olsun
8    Garka-i rahmet ola rûh-ı revân-ı Sultân / Hûrîler mûnis ola gül-şen-i firdevs mekân