003 - Tercî'-bend berây-ı cülûs-ı Sultân Murâd Hân bin Selîm Hân

-I-
1    Tâli' oldı neyyir-i ikbâl ü devlet subh-dem / Şu'le saldı 'âleme necm-i hidâyet subh-dem
2    Kâ'inâtı kıldı mir'ât-ı cemâl-i Şâhdan / Gark-ı envâr-ı hidâyet Rabb-i 'izzet subh-dem
3    Çokdan eylerdi cemâl-i bâ-kemâlin ârzû / Ber-murâd oldı hele tâc-ı sa'âdet subh-dem
4    Şeş cihâtı rûşen itdi tal'atından gün gibi / Buldı zînet çâr-sû-yı mülk ü millet subh-dem
5    Nâ-gehân bir toz kopardı bâd-pây-ı devleti / Rûşen oldı dîde-i a'yân-ı devlet subh-dem
6    Nevbet ol Şâh-ı cevân-baht-ı cihânundur diyü / Çaldılar eflâkdan kûs-ı beşâret subh-dem
7    Âfitâb-ı 'âlem-ârâ gibi zerrîn tâc ile / Taht-ı sîmîn üzre saldı ferr-i devlet subh-dem
8    Sâye-i Yezdân penâh-ı dîn ü devlet Hân Murâd / Dâver-i devrân mu'izz-i saltanat Sultân Murâd
-II-
1    Tab'ı mir'ât-i cemâl-i cân-fezâ-yı saltanat / Sînesi Âyîne-i 'âlem-nümâ-yı saltanat
2    Âsitânı topragından tûtiyâ-yı çeşm-i baht / Hâk-i pâyı cevherinden kîmyâ-yı saltanat
3    Çeşme-sâr-ı sebze-zâr-ı devletinden reşhadur / Âb-ı rûy-ı hançer-i kişver-güşâ-yı saltanat
4    Gûşe-i destârına sandum otaga takdılar / Sâye salmış farkına perr-i hümâ-yı saltanat
5    Düşmene salınsa tîg-i hûn-feşânı yaraşur / Yiridür olsa hırâmân ol livâ-yı saltanat
6    Kim biri bir dil-ber-i zerrîn-külâh-ı bahtdur / Ol biri bir şâhid-i la'lîn-kabâ-yı saltanat
7    Kilk-i üstâd-ı kader kılmış bu garrâ matla'ı / Zînet-i eyvân-ı kasr-ı kibriyâ-yı saltanat
8    Sâye-i Yezdân penâh-ı dîn ü devlet Hân Murâd / Dâver-i devrân mu'izz-i saltanat Sultân Murâd
- III -
1    Sensin ey çeşm-i çerâg-ı dûdmân-ı ma'delet / Şem'-i nûr-efşân-ı bezm-i hânedân-ı ma'delet
2    Hüsn-i re'yün âfitâb-ı bî-zevâl-i mülk ü dîn / Lutf-ı tab'un nev-bahâr-ı bî-hazân-ı ma'delet
3    Zât-ı pâkün vasfı der-gâh-ı refî'ün ismidür / Âfitâb-ı baht u devlet âsmân-ı ma'delet
4    Şeb-çerâg-ı zulmet-i zulm ol vücûd-ı pâkdür / Gevherin hakkâ ki izhâr itdi kân-ı ma'delet
5    Sidre vü Tûbâya baglandı tınâb-ı kibriyâ / Çarhdan a'lâ kurıldı sâye-bân-ı ma'delet
6    Saltanat menşûrına ism-i şerifün yazdılar / Dahı peydâ olmadın nâm u nişân-ı ma'delet
7    Hep bu beyt-i dil-keş üzre baglanur gûş eylesen / Savt u nakş-ı bülbülân-ı gül-sitân-ı ma'delet
8    Sâye-i Yezdân penâh-ı dîn ü devlet Hân Murâd / Dâver-i devrân mu'izz-i saltanat Sultân Murâd
-IV-
1    Şâd olun kim Pâdişâh-ı dâd-güsterdür gelen / Husrev-i 'âdil şehenşâh-ı muzafferdür gelen
2    Dâver-i Dârâ-haşem Dârâ-yı İskender-kadem / Husrev-i fermân-revâ-yı heft kişverdür gelen
3    Nefha-i müşgîn-nesîm-i hulkı tutdı 'âlemi / Her tarafdan şimdi bûy-ı 'ûd u 'anberdür gelen
4    Sâhib-i fazl u kemâlün virdi hakkın rûzgâr / Ol kemâl-i fazl-ı Hakdan lutfa mazhardur gelen
5    Devletinde mihnet-i devrândan ey Bâkî ne gam / Hamdü li'llâh Pâdişâh-ı bende-perverdür gelen
6    Tab'-ı pâkün gevherinden feyzin eyler mi dirîg / Nûr-bahş-ı çeşme-i hûrşîd-i enverdür gelen
7    Dest-gîr-i ehl-i dil kimdür diyü fâl eyledüm / İşbu beyt-i rûşen ü pâkîze-gevherdür gelen
8    Sâye-i Yezdân penâh-ı dîn ü devlet Hân Murâd / Dâver-i devrân mu'izz-i saltanat Sultân Murâd
-V-
1    Gül gibi halkı nesîm-i hulkı handân eylesün / Nev-bahâr-ı 'adli âfâkı gül-istân eylesün
2    Âsmânun gûşe-i bâm-ı zümürrüd-fâmına / Kadri tâvûsı çıkup gün gibi cevlân eylesün
3    Kâr-gâh-ı dîn ü devletde düşen düşvâr işin / Hak Te'âlâ hazreti lutfından âsân eylesün
4    Târ-ı zülf ü turra-i hûbân-ı müşgîn-mû gibi / Sâl-i ikbâlin Hudâ bî-hadd ü pâyân eylesün
5    Karşusında ayagın tursun mülûk el baglasun / Kendü çıksun bâr-gâh-ı 'adle dîvân eylesün
6    Şevket-i İskender ü dârât-ı Dârâ bî-kusûr / Mesnedin şimden girü taht-ı Süleymân eylesün
7    Mülk-i Mısra nitekim bir bendesin sultân ider / Bir kulın salsun diyâr-ı Çîne hâkân eylesün
8    Sâye-i Yezdân penâh-ı dîn ü devlet Hân Murâd / Dâver-i devrân mu'izz-i saltanat Sultân Murâd