005- Tahmîs-i Gazel-i Sultân Selîm Hân

-I-
1    Ey cemâlün pertev-i envâr-ı subh-ı lem-yezel
2    Ber-ter olsa menzilün hûrşîd-i enverden mahal
3    Sende göstermiş kemâl-i sun'ın Üstâd-ı ezel
4    Kudretin izhâr idüp Hak Hazreti 'azze ve cel
5    Cümle hûbân içre sen cânânı kılmış bî-bedel
-II-
1    İşigün üftâdesi kem-ter gedâ mihr-i münîr
2    Pençe-i hûrşîd-i 'âlem-tâba hüsnün dest-gîr
3    Her gedâ-yı âsitânun bir şeh-i sâhib-serîr
4    Mısr-ı dilde şâh olur yüzün görüp olan esîr
5    Hüsni ey Yûsufdan ahsen ey güzellerden güzel
-III-
1    'Âşıka yâd-ı lebün câm-ı şarâb-ı dil-güşâ
2    Câna ol la'l-i musaffâdur mey-i bezm-i safâ
3    Rûh-bahş olmış Mesîhâ-veş o la'l-i cân-fezâ
4    La'l-i mey-gûnûn görüp cân virmeyen kimdür şehâ
5    Pes meger âdem degül 'aklında vardur yâ halel
-IV-
1    Halka-i zülf-i siyâhun ey saçı müşg-i Huten
2    Na'l-i şeb-dîz-i hatundur dirler erbâb-ı suhan
3    Kimdür ol ruhsâre-i gül-gûn ile senden geçen
4    Hüsnüni bir dem gören ey husrev-i şîrîn-dehen
5    'Aşkuna Ferhâd olup yolunda cân virse mahal
-V-
1    Kaddüne hıl'at biçelden hüsni hayyât-ı kazâ
2    Gün gibi yakdun cihânı ey meh-i zerrîn-kabâ
3    Çâk idüpdür gerçi kim sabrum girîbânın cefâ
4    Dâmenün cevr ile elden koya sanma dil-berâ
5    Ol olacak iş degül yakam tutınca tâ ecel
-VI-
1    Gözdeki hûn-âbe-i âlüm görüp rahm itmedün
2    Yollar üzre cism-i pâ-mâlüm görüp rahm itmedün
3    Bu perîşan olmış ahvâlüm görüp rahm itmedün
4    Derd-mend-i 'aşkunam hâlüm görüp rahm itmedün
5    Yol olur dilden dile dirlerdi hod vardur mesel
-VII-
1    Bâkıyâ kûy-ı harâbâtı nişîmen kıldugum
2    Bezm-i 'aşkı şem'-i âhumla müzeyyen kıldugum
3    Ser-nüviştüm hâlidür âfâka rûşen kıldugum
4    Ey Selîm ebrû diyüp çeşm üzre mesken kıldugum
5    Alnuma 'aşk ile yazılan yazulardur ezel