006 - Tahmîs-i Gazel-i Sultân Selîm Hân

- I -
1    Geşt ü güzâr-ı bâg ne hoşdur nigâr ile
2    Bir nev-resîde gonca-dehen gül-'izâr ile
3    Çün tâzelendi gül-şen-i 'âlem bahâr ile
4    Hoşdur çemende seyr idelüm tâze yâr ile
5    Tâ düşmenün yüregi yana tâze yarıla
- II -
1    Erkân-ı 'aşka zerk u riyâdan halel virüp
2    Zühd adın anma tab'a n'idersin kesel virüp
3    Bâg-ı bihişt çünki alınmaz bedel virüp
4    Nakd-i cinân degül mi bu kim devlet el virüp
5    Vasl-ı habîbe fursat ola nev-bahâr ile
- III -
1    Terk eyle zühdi mezheb-i rindân-ı 'aşka gir
2    Nakd-i revânı bir büt-i zîbâ-cemâle vir
3    Bir kaç piyâle bâde çeküp deyr-i bâga ir
4    Bülbül kitâbın almış ele pendi bu ki dir
5    Hôşdur piyâle bir sanem-i gül-'izâr ile
-IV-
1    Hâtır harâb u 'akl müşevveş sen irmesen
2    Gül-zâr-ı cennet olmaya dil-keş sen irmesen
3    Güller çemende görinür âteş sen irmesen
4    Ey nev-bahâr-ı hüsn Hızır-veş sen irmesen
5    Gül-şen gözüme dûzah olur intizâr ile
-V-
1    Olsun hezâr-ı zâr u dil-efgâr çâkerün
2    Kılsun figân u nâleler üftâde-i derün
3    Dellâl-i hüsni mürg-i çemendür gül-i terün
4    İncinme âh-ı 'âşıka cânâ ki güllerün
5    Artar cemâli revnakı âh-ı hezâr ile
-VI-
1    Virmiş 'izâr-ı yâra safâ hatt-ı dil-güşâ
2    Yazmış ruhında sûre-i Ve'ş-şemsi Ve'd-duhâ
3    Bulmış cemâli âyinesi mâh-veş cilâ
4    Mir'ât-ı hüsne sanma keder irişe dilâ
5    Nûr âyeti yazılsa hat-ı müşg-bâr ile
-VII-
1    Seyl-âb gibi saldı belâ leşgeri akın
2    Tîr-i kazâya oldı ber-â-ber ırak yakın
3    Seng-i fenâya çaldı hevâ sabr zevrakın
4    Ta'n itme emr-i Hakka yüri müdde'î sakın
5    Ahvâl-i 'aşk çünki degül ihtiyâr ile
    -VIII -
1    Gül gibi şi'r-i Bâkîye bir dem kulagun ur
2    Derd-i derûnı bülbül-i şûrîde-hâle sor
3    Gel bir kenâra meclis-i mihr ü vefâyı kur
4    Şun la'l-i cân-fezâyı Selîme şehâ k'olur
5    Yârun safâ-yı vuslatı bûs u kenâr ile