007 - Tahmîs-i Gazel-i Sultân Murâd Hân

-I-
1    Ne mümkindür nazar bir lahza hüsn-i tal'at-i yâre
2    Degül çünkim müyesser lem'a-i hûrşîde nezzâre
3    Gubâr-ı der-gehün kühl itmedin çeşm-i güher-bâre
4    Nice tâkat getürsin çeşm-i 'âşık rûy-ı dil-dâre
5    Getürmez tâb çün bir lahza berk-ı tâb-ı envâre
- II -
1    Çerâgın şem'-i dâgumdan yakar hûrşîd-i 'âlem-gerd
2    Ocagın sîne-i germün fürûzân eyler âh-ı serd
3    Ciger pür-zahm-ı hicrân şerha şerha cism-i gam-perverd
4    Mukîm-i hânkah-ı 'aşk olaldan bu dil-i pür-derd
5    Olur abdâl-ı mihnet bagrı yara cismi sad pâre
- III -
1    Hayâlün taht-gâhıdur derûn-ı sîne-i rûşen
2    Sezâ-vâr olmaz ol sadre eger Dârâ eger Behmen
3    Yaraşmaz mesned-i halvet-sarây-ı dilde illâ sen
4    Tefekkür eylemez bir dem gönül efkâr-ı gayrîden
5    Bu dil yârun serîridür virilmez yol agyâre
-IV-
1    Egerçi tîg-i bî-dâdı derûnum togradı muhkem
2    Akıtdı çeşme-i çeşmüm gamından nice demler dem
3    Dil-i mecrûha şemşîrinden ayrı urmadı merhem
4    Ne çâre çâre andandur dil-i bî-çâreye her dem
5    Çü yara uran oldur yine andan merhem ü çâre
-V-
1    Marîz-i 'illet-i 'aşka şarâb-ı la'lidür şerbet
2    Bulur câm-ı visâlinden ölümlü hasteler sıhhat
3    Garaz dermân ise Bâkî yüri var derde kıl himmet
4    Murâdun sözlerinün gösterür her harfi bir hikmet
5    Ne hikmet belki 'ibretdür devâdur cümle bîmâre