008 - Tahmîs-i Gazel-i Necâtî

-I-
1    Râyet-i fitne çeküp ol kad-i dil-cû begler
2    Üşdiler yanına her şûh-ı cefâ-hû begler
3    Bir yire geldi nice gamzesi câdû begler
4    Bir âlây oldı perî şîvelü âhû begler
5    Gözi âhûlarun âlâyına yâ Hû begler
-II-
1    Kaynadup nâr-ı gam-ı 'aşk ile hûn-ı cigeri
2    Gözlerümden akıdur kendü görinmez o perî
3    Sanmanuz nev'-i beşerden gele bu şîveleri
4    Bir perî içün akar iki gözüm çeşmeleri
5    Sakınun bilmiş olun ılıdur ol su begler
-III-
1    Cân yidürsen eger ol husrev-i şîrîn-dehene
2    Gâlib olsan reh-i 'aşkında bu gün Kûh-kene
3    Ne kadar nakd-i revânunda nisâr olsa yine
4    Bî-vefâlıklar ider yolına cânlar virene
5    'Acebâ böyle m'olur dünyede hep bu begler
-IV-
1    Pâk-rû tâze-cevândur bana cânumdan e'az
2    Gelmedi yanuma zen kısmı meger duhter-i rez
3    Bakmadum atlas u dîbâsına dehrün bir kez
4    Raht u bahtum götüri oda urursan dütmez
5    Bir iki gün beni bu dünyede mahbûb egler
-V-
1    Boynuna hîle kemendin biri baglar nâ-gâh
2    Çıkarur togru yolundan biri eyler güm-râh
3    Bu belâya bulımaz çâre ne dervîş ü ne şâh
4    Kimseye uymasun ulaşmasun Allâh Allâh
5    Zülf-i bî-dîn ile ol gamze-i câdû begler
-VI-
1    Bâkıyâ gel olalum Ka'be-i dil yolına peyk
2    Diyelüm sem'a nidâ iricek âhır Lebbeyk
3    Girelüm râh-ı Hudâya diyüp e's-sa'yü ileyk
4    Ne Necâtî ne güzeller ne selâmün ne 'aleyk
5    Fâriguz eylemezüz kimseye tapu begler